Bu sözləri qida eksperti Fərid Səfərov ''Sherg.az"a açılamasında söyləyib.
Onun sözlərinə görə, yağlı ətlərdə daha çox doymuş yağ, xolesterin olduğu üçün ürək-damar xəstəliyi, diabet, hipertoniya kimi xəstəlikləri olanlar diqqətli şəkildə yağsız qırmızı ət və dərisiz ağ ət (toyuq, hinduşka), balıqlara üstünlük verməlidir:
"Tərkibində "Omeqa-3" yüksək olduğu üçün sağlam qidalanma məqsədilə həftədə ən azı iki dəfə balıq yeyilməlidir. Əti düzgün şəkildə saxlamaq, bişirmək və istehlak etmək önəmlidir.
Baytarlıq nəzarətindən keçmiş ət istehlak edilməlidir. Qeyri-qanuni kəsilmiş ət xəstəlik törədiciləri daşıya bilər və hərtərəfli bişirildikdən sonra yeyilməlidir. Qaynatma və qril kimi bişirmə üsullarına üstünlük verilməli, qızardılmadan qaçınılmalıdır. Ət yeməklərinə yağ əlavə edilməməlidir. Əti qrildə bişirərkən ətlə odun arasında olan məsafə elə tənzimlənməlidir ki, ətin yanması, kömürləşməsinə səbəb olmasın. Əks halda kanserogen maddələr əmələ gələr. Eyni səbəbdən ət çox yüksək temperaturda uzun müddət bişirilməməlidir. Etibarlı yerlərdən alınmalıdır. Dərhal istehlak edilməzsə, soyuqda və ya dondurucuda saxlanmalıdır. Əti tərəvəz və meyvələrlə birlikdə yeməyi unutmayın. Qəbizliyin qarşısını almaq üçün gündə 8-10 stəkan su için. Həzmi asanlaşdırmaq, həzm problemlərini minimuma endirmək üçün əti yaxşıca çeynəyin. Gün ərzində mümkün qədər çox hərəkət edərək həzm sisteminizə kömək edin.
İstehlak etdiyiniz ətin mümkün qədər yağsız olmasına diqqət edin.
Yatmadan 4 saat əvvəl ət istehlak etməməyə çalışın, çünki həzmi çətinləşdirəcək. Ətlə yüksək kalorili içkilər içməyin".
