Bir çox insanın səhəri duşla başlayır. Bu proses, oyanmağa kömək edir, yuxusuzluğu aradan qaldırır, özümüzü daha təmiz və gümrah hiss etdirsə də, gündəlik duş qəbul etməyin zərərli olduğunu, dərini korladığı, mikrobiomu yuyub qurutduğu və qocaltdığı barədə fikirlər eşidilir.
Saglamolun.az xəbər verir ki, Britaniya klinikasında aparılan yeni klinik tədqiqat bu mövzunu araşdırıb. Tədqiqatda ekzema xəstəliyi olan 400-dən çox insan iştirak edib. Onlar 2 qrupa bölünüb: 1-ci qrup hər gün, 2-ci qrup isə yalnız həftədə 1 və ya 2 dəfə duş qəbul edənlər olub. Nəticədə məlum olub ki, gündəlik duş dərinin qurumasına səbəb olmur, hətta xroniki dəri xəstəlikləri olan şəxslərdə belə. Mütəxəssislərin fikrincə, əsas olan nə qədər tez-tez yuyunduğunuz deyil, nə ilə və necə yuyunduğunuzdur. Suyun temperaturu, yuyucu vasitələrin seçimi, prosedurun müddəti və duşdan sonra dərinin baxımı çox vacibdir.
