Tibbin atalarından sayılan İbn Sina min il əvvəl yazdığı “El-Kanun fi’t-Tıbb” əsərində insan sağlamlığı ilə bağlı diqqətəlayiq tövsiyələr verib.
Sherg.az xəbər verir ki, yüzillər keçməsinə baxmayaraq, bu məsləhətlərin bir çoxu bu gün də təəccüblü şəkildə aktuallığını qoruyur. Xüsusilə mövsüm dəyişikliklərində düzgün qidalanma və həyat tərzi vərdişləri ilə bağlı verdiyi tövsiyələr, müasir dövrdə tez-tez rast gəlinən xəstəliklərin səbəblərini də ortaya qoyur.
Payızda duzlu və quru qidalardan uzaq durun
İbn Sina payız aylarında duzlu və quru qidaların xəstəlikləri tətiklədiyini vurğulayır. Pendirlərin, balıqların və duzlanmış qidaların bu dövrdə istehlak edilməməsi tövsiyə olunur. Onun fikrincə, bu cür qidalar “hər cür xəstəliyin mənbəyi” ola bilər.
Bu gün ilıq suyun faydalı olduğu geniş inanılır, lakin İbn Sina bunun əksini düşünür. Onun fikrincə, yeməkdən sonra ilıq su içmək yerinə az miqdarda soyuq su içmək həzm üçün daha faydalıdır. O, xüsusilə qeyd edir ki, ilıq su “fayda vermir”.
Düzgün qidalanma balansı
İbn Sina fərqli rənglərdə və növlərdə qida qəbulunu tövsiyə edir. Yağlı qidaların yanında duzlu və ya acı qidaların, turş qidaların yanında isə şirinlərin istehlak edilməsini məsləhət görür. Qızartma ilə qaynadılmış, qırmızı ət ilə balıq, ət ilə süd kimi bəzi qida kombinasiyalarını isə sağlam saymır.
Şirniyyatlar haqqında xəbərdarlıq
İbn Sina şirniyyatları iki kateqoriyaya ayırır:
Bal ilə hazırlanan şirniyyatlar: Mədəyə rahatlıq verir, həzmə kömək edir.
Xəmirdən hazırlanan şirniyyatlar: Həzm üçün çətindir, damar və oynaq tıxanmasına səbəb ola bilər.
O həmçinin bildirir ki, həddindən artıq şirniyyat qəbulu qan üzərində mənfi təsir yaradır.
Ət və meyvə tövsiyələri
İbn Sina zəngin və ağır ətlərdən uzaq durmağı tövsiyə edir. Payızda isə üzüm və qarpuz rahatlıqla yeyilə bilər. Yay aylarında isə turş qidalar, məsələn, qarağat, nar üstünlük təşkil etməlidir.
İdman, yuxu və gündəlik həyat tövsiyələri
Yeməkdən əvvəl yüngül idman edin, yeməkdən sonra hərəkət etməyin.
Həddindən artıq yuxu bədəni soyudur, insanı səssiz və istəksiz edir.
Yuxusuzluq isə bədəni qurudur, iradəni zəiflədir və zehnin balansını pozur.
