“Əks halda sərt karantin rejimindən hələ uzun müddət çıxa bilməyəcəyik”
“Maskadan istifadə, sosial məsafə, şəxsi gigiyena və ətraf mühitin qorunmasına əməl etməklə əvvəlki həyat tempinə qayıda bilərik”
Ölkəmizdə xüsusi karantin rejiminin müddəti 28 dekabr 2020-ci il tarixinə qədər uzadılıb. Eyni zamandan karantin qaydaları yenidən sərtləşdirilib. Artıq 21 noyabr tarixindən etibarən xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda müvafiq qaydada tibbi maskalardan istifadə məcburi hesab olunur. Təbii ki, karantin qaydalarının sərləşməsinə yoluxma sayının artması səbəb oldu. Məsələn elə bu gün Azərbaycanda koronavirus (COVID-19) infeksiyasına 2 597 yeni yoluxma faktı qeydə alınıb, 1 354 nəfər müalicə olunaraq sağalıb və evə buraxılıb. COVID-19 üçün götürülən analiz nümunələri müsbət çıxmış 23 nəfər vəfat edib.
Yoluxma sayının artmasına dair fikirlərini “Sherg.az”la bölüşən Hemofiliyalı Xəstələrin Respublika Assosiasiyasının sədri Ayaz Hüseynov bildirib ki, cəmiyyətimizdə hələ də qoyulan sadə qaydalara əməl etməyənlər var:
“Belə çətin bir məqamda hər kəs birlik göstərməlidir. Dövlətin qoyduğu qaydalara şərtsiz əməl edilməlidir. Yalnız bundan sonra yoluxma sayı minimuma endikdə, normal həyata qayıda bilərik. İndi isə əsas olan sadə qaydalara riayət etməkdir. Təəssüf ki, ictimai nəqliyyatda maskadan istifadə etməyən vətəndaşlara rast gəlirik. Maskadan istifadə etməmək isə yoluxma ehtimalını artırır. Bu baxımdan hər birimizin məsuliyyətli olması vacibdir”.
Assosiasiya sədri vurğulayıb ki, belə ağır dönəmdə cəmiyyət və dövlət tamlığı ilə bir olmalı və qoyulan qaydalar yekdilliklə əməl edilməlidir:
“Əks halda sərt karantin rejimindən hələ uzun müddət çıxa bilməyəcəyik. Dünyada COVİD -19 infeksiyasına qarşı peyənd icad edilənə qədər, saydığımız sadə qaydaları: maskadan istifadə, sosial məsafə, şəxsi gigiyena və ətraf mühitin qorunmasına əməl etməklə tez zamanda karantin rejimindən çıxa və əvvəlki həyat tempinə qayıda bilərik”.
