Yeni doğulmuş körpələrdə beyin zədəsi erkən aşkar edilə biləcək
İngiltərədə alimlər doğuş zamanı baş verən beyin zədəsini müəyyən edə bilən xüsusi bir başlıq hazırlayıblar.
Sherg.az xəbər verir ki, Kembric Universitetinin mütəxəssisləri yenidoğulmuş körpələrin beyinlərini yüksək dəqiqliklə izləmək üçün yeni texnologiya üzərində işləyiblər.
“Theo” adlı üç həftəlik körpə üzərində sınaqdan keçirilən bu başlıq üzgüçü papağını xatırladır. Ultrason və optik tomoqrafiya texnologiyaları ilə təchiz edilən başlıq vasitəsilə körpələrin beynindəki oksigen səviyyəsi çox yüksək həssaslıqla izlənilə bilir.
“FUSION” adlandırılan bu texnologiya sayəsində yeni doğulanlarda baş verə biləcək beyin zədələri erkən mərhələdə aşkar ediləcək.
Doğuş zamanı beynin kifayət qədər oksigen ala bilməməsi nəticəsində yaranan hipoksiya, körpələrin ömürlük əlilliyinə səbəb olan əsas amillərdən biridir. Bu vəziyyət epilepsiya və ya serebral iflic (serebral palsi) kimi xəstəliklərə də yol aça bilir.
Mövcud izləmə üsulları beyin zədəsinin uzunmüddətli təsirlərini öncədən müəyyən etməkdə kifayət qədər təsirli deyil. Yeni texnologiya sayəsində erkən diaqnoz mümkün olacaq və müalicə, həmçinin dəstəkləyici müdaxilələr daha tez həyata keçiriləcək.
Hazırda sınaqları davam etdirən alimlər başlığın istehsal xərclərini azaltmağı da hədəfləyirlər.
Turan
