Əbülfəz Qarayev adına 2 saylı Kliniki Uşaq Xəstəxanasında ürək aparatının işləməməsi xəbəri ictimaiyyətdə narahatlıq yaradıb. Bakupost.az saytında yayılan məlumata görə, Bakı sakini Zöhrab Əliyev 13 yaşlı övladını kəskin ürək ağrıları səbəbindən xəstəxanaya aparsa da, tibbi personal müayinəni aparatın işləməməsi səbəbindən həyata keçirə bilməyib. Hadisə ilə bağlı TƏBİB-ə sorğu göndərilib və məsələ ilə bağlı rəsmi açıqlamanın verilməsi gözlənilir.
Professor Adil Qeybulla isə Sherg.az-a açıqlamasında bildirib ki, hər hansı bir xəstəxanada aparatın işləməməsi əsasən texniki xarakterli hadisə sayılır və praktiki olaraq səhiyyə müəssisələrində zaman-zaman baş verə bilər. Tibbi avadanlıqlar gündəlik istifadədə olduqda, təbii olaraq müəyyən bir vaxtdan sonra sıradan çıxmaq, nasazlıq göstərmək ehtimalı artır. A. Qeybulla həmçinin bildirib ki, bu cür halların qarşısını almaq üçün xəstəxanalarda daimi texniki baxışların aparılması, ehtiyat avadanlıqların mövcudluğu və tibbi personalın nasazlıq barədə dərhal məlumat verməsi vacibdir:
"Texniki nasazlıqlar insan həyatına təhlükə yarada biləcəyi üçün, müvafiq idarəetmə sistemi çərçivəsində sürətlə həll olunmalıdır. Qeyd olunmalıdır ki, tibbi avadanlıqların sıradan çıxması qətiliklə qəbuledilməz olsa da, bu, təkcə sözügedən xəstəxananın problemi deyil; belə halların baş verməməsi üçün profilaktik baxışlar və avadanlıq ehtiyatlarının təmin olunması vacibdir. Valideynlərin şikayəti isə belə halların cəmiyyətə açıq şəkildə çatdırılması baxımından əhəmiyyətlidir".
