30.07.2025-ci il tarixində 05.08.2016-ci il təvəllüdlü Qax rayon sakini (qadın cinsli) ürəkbulanma, iştahsızlıq və qarın ağrısı şikayətləri ilə Kliniki Tibbi Mərkəzə yerləşdirilib.
Bu barədə Kliniki Tibbi Mərkəz məlumat yayıb.
Bildirilib ki, aparılan radioloji müayinələrdən sonra ona tirixofagiya diaqnozu (mədəsində saç kütləsi bezoar) qoyulub və Uşaq Cərrahiyyə şöbəsinə yerləşdirilib.
9 yaşlı azyaşlının mədəsində aparılan cərrahi əməliyyat uğurla bitib və saç kütləsi xaric edilib.
Hazırda onun müalicəsi Uşaq Cərrahiyyə şöbəsində davam etdirilir, vəziyyəti stabil qiymətləndirilir.
Qeyd edək ki, tirixofagiya adlandırılan xəstəlik əslində psixoloji problemdir. Uşaqlar öz saçlarını və ya yerə düşən tükləri götürüb yeyirlər. Bu zaman mədədə tük topası yığılır, tükdən ibarət böyük kütlə əmələ gəlir. Kütlə mədəni tam tutduqda artıq qidalana bilməmək, qusma və mədə nahiyəsində şişkinlik kimi əlamətlər ortaya çıxır.
Pediatr Vaqif Qarayev “Sherg.az”a bildirdi ki, bu məsələdə iki ehtimal mövcuddur:
“Birincisi, uşağın ruhi-psixoloji vəziyyətində ciddi pozuntu ola bilər. Bu səbəbdən də o nə etdiyini dərk etmir. İkincisi isə zərərli davranışa meyilliliyin mövcudluğu ehtimalıdır. Əgər uşağın psixoloji vəziyyəti normaldırsa, valideynin əsas vəzifəsi onu bu vərdişdən uzaqlaşdırmaq və müvafiq davranış korreksiyası həyata keçirməkdir. Əgər psixiatrik pozuntu təsbit olunarsa, uşaq ixtisaslaşmış psixiatr və ya klinik psixoloq nəzarətinə verilməlidir. Həmçinin psixoterapevtik və zəruri hallarda farmakoloji müdaxilə ilə müalicə olunmalıdır. Belə hallarda trixobezoar formalaşdığı təqdirdə isə, təcili şəkildə cərrahi müdaxilə tələb olunur. Bu kimi hallar erkən diaqnostika, valideyn maarifləndirilməsi və məktəb-ailə-psixoloq əməkdaşlığının vacibliyini bir daha önə çıxarır. Uşaq psixologiyasında kompulsiv davranışların yaranması çox zaman emosional ehtiyacların qarşılanmaması ilə əlaqədardır. Hər hansı qeyri-adekvat davranışın arxasında kompleks psixoloji faktorlar dayanır və bu hallar sadəcə simptom kimi deyil, dərin səbəblərin göstəricisi kimi qiymətləndirilməlidir. Profilaktik tədbirlər görülmədiyi təqdirdə, bu cür vərdişlər daha ağır klinik vəziyyətlərə gətirib çıxara bilər”.
