Ümumdünya Səhiyyə Təşkilatı (ÜST) həyəcan təbili çalır. Məlum olub ki, Avropa təhlükəli xəstəlik səbəbindən yavaş-yavaş məhv olur. Söhbət alkoqollu içkilərdən sui-istifadə nəticəsində yaranan xərçəng xəstəliyindən gedir.
Oxu.Az xəbər verir ki, bu barədə FAZ nəşri yazıb.
Avropa İttifaqında dünyanın bütün regionları arasında spirtli içki istehlakının ən yüksək səviyyəsi qeydə alınıb. Xərçəng Aİ-də ölüm hallarının əsas səbəbi olaraq qalır. 2020-ci ildə ÜST alkoqollu içki istifadəsi ilə bağlı xərçəngə 111 300 yeni tutulma faktı qeydə alıb. Nəticədə 93 min nəfər xərçəngdən dünyasını dəyişib. Bu məlumatlar qurumun çərşənbə axşamı açıqladığı xərçəngin profilaktikasına dair təlimatda yer alıb.
Bildirilir ki, alkoqollu içki aludəçiliyi ən azı yeddi növ onkoloji xəstəliyə gətirib çıxarır. 2020-ci ildə o, ən çox kolorektal xərçəngi (36 900), süd vəzi xərçəngi (24 200 ) və ağız boşluğu xərçəngi (12 400) kimi xərçəng növlərinin inkişafına gətirib çıxarıb. Xəstələrin təxminən 70%-ni kişilər təşkil edib.
ÜST-nin daha bir məlumatına görə, 2018-ci ildə alkoqollu içki aludəçiliyi ilə bağlı vaxtsız ölüm halları nəticəsində iqtisadi itkilər 4.58 milyard avroya çatıb. Özü də bu məbləğə tibb müəssisələrində müalicə kimi əlavə xərclər daxil deyil.
