“Hər halda bu istiqamətdə mübarizənin aparılması üçün mühüm addım hesab olunur”
İcbari Tibbi Sığorta üzrə Dövlət Agentliyi və GAVI (Global Alliance for Vaccines) təşkilatı arasında saziş imzalanıb. Bu barədə TƏBİB-in Xəstəliklərin kontrolu və profilaktikası departamentinin müdiri Yaqut Qarayeva məlumat verib. Y.Qarayeva qeyd edib ki, əhalimizin 10 faizinə peyvənd vurulması üçün vaksinlər gözləyirik. Onun sözlərinə görə, GAVI tərəfindən Azərbaycana hansı vaksinlərin verilməsi barədə hələlik məlumat yoxdur:
“Vaksinlərin vurulması ilk olaraq risk qruplarına şamil olunacaq. Yaxın günlərdə əhaliyə vaksinlər barədə geniş məlumatlar veriləcək. Peyvəndin yarada biləcəyi allergik reaksiya ola bilər. Bundan heç kim sığortalanmayıb. Bu, o demək deyil ki, peyvəndlər təhlükəlidir”.
Tibb elmləri doktoru, professor Adil Qeybulla da “Sherg.az”a açıqlamasında söyləyib ki, allergik reaksiyası olan şəxslərin vaksin vurdurmalarında hansısa təhlükə yoxdur.
Həkim bildirib ki, vaksinasiya bütün dünyada tətbiq olunan bir prosesdir:
“İstənilən dərman preparatları, hətta vitaminlər də allergik reaksiyası olan şəxslərdə həssaslıq yarada bilər. Vaksinlərin reaksiyaları cüzi olur. Yəni çox nadir hallarda güclü reaksiyalar, məsələn qıcolmalar müşahidə oluna bilər. Bunların da tam səbəbi hələ bilinmir. Hesab edirəm ki, xırda allergik reaksiyalar, qızartılar və ağrıların olması təbii haldır”.
Professor vaksinasiya prosesinin tərəfdarı olduğunu diqqətə çatdırıb:
“Hər birimiz uşaq vaxtlarından vaksinlər vurdurmuşuq. Hazırda azyaşlı uşaqlarda heç bir yoluxucu xəstəlik-qızılca, difteriya, quru öskürək və.s yoxdur. Bu xəstəliklərin olmaması da vaksiyansiya hesabınadır. Ona görə də vaksin tətbiqinə müsbət yanaşmaq lazımdır”.
A.Qeybulla vurğulayıb ki, allergik reaksiyası olan şəxslər nəyə qarşı həsas olduqlarını bilirlər. Bu zaman əlavə tədbirlər görülməlidir:
“Məsələn, xəstəyə bir gün öncədən müəyyən dərmanlar vurmaq olar ki, vaksinlərlə bağlı problem yaşanmasın. Vaksinlər pandemiya ilə mübarizədə bir faktordur.
Düzdür, onların vurulması pandemiyanın sonu demək deyil. Lakin hər halda bu istiqamətdə mübarizənin aparılması üçün mühüm addım hesab olunur”.
