Ermənistan üçün maliyyənin kəsilməsi, azalması onlar üçün fəlakətə bərabərdir
“O yerdə ki erməni faktoru daxil olub, həmin anda Azərbaycanla münasibətlərdə problemlər yaşanıb”
ABŞ-nin yeni prezidenti seçilən Donald Trampın hakimiyyəti dönəmində Vaşinqton-Bakı əlaqələrinin yeni mərhələyə keçəcəyi, kifayət qədər gərginləşmiş münasibətlərin normallaşacağı ehtimal edilir. Ötən gün Prezident İlham Əliyev həmkarı Donald Trampa zəng edərək onu yenidən ABŞ-nin rəhbəri seçilməsi münasibətilə təbrik edib. Ölkə başçısı bildirib ki, seçkilərdə inamlı qələbə Amerika xalqının onun yürütdüyü siyasi xəttə böyük dəstək və etimadının aşkar ifadəsidir. Dövlət rəhbəri vurğulayıb ki, Trampın fəaliyyəti dünyada təhlükəsizliyin təmin olunmasında daha da önəmli rol oynayacaq. Birinci prezidentlik dövründə Azərbaycan-ABŞ arasında dostluq və əməkdaşlığın möhkəmlənməsinə Donald Trampın xüsusi diqqət ayırdığını deyən dövlət başçısı ikitərəfli əlaqələrimizin irəli aparılması üçün birgə səylər göstəriləcəyinə ümidvarlığını bildirib. D.Tramp da öz növbəsində səmimi təbriklərə görə Prezident İlham Əliyevə dərin təşəkkürünü bildirib, ölkələrimiz arasında əməkdaşlığın inkişaf etdirilməsi məqsədilə birgə səylərlə çalışmağın vacibliyini qeyd edib. Bu faktın özü belə Tramp administrasiyası ilə Azərbaycan arasında müsbət münasibətlərin inkişaf etdiriləcəyinə dəlalət edir. Nəzərə alaq ki, Tramp Administrasiyasında Azərbaycana qarşı şəxslərin olması heç də ölkəmiz əleyhinə əvvəlki siyasətin davam etdiriləcəyini deməyə əsas vermir.
Təhlükəsizlik məsələləri üzrə ekspert, politoloq İlham İsmayıl "Sherg.az"a deyib ki, 1992-ci ildən bu yana ABŞ ilə Azərbaycan arasında münasibətlər heç də hər zaman hamar olmayıb, müəyyən dərəcədə enişli-yoxuşlu olub. Ekspertin sözlərinə görə, ABŞ-Azərbaycan münasibətlərinin hamar olmamasının əsas səbəbi birmənalı şəkildə erməni faktoru ilə bağlı idi:
"ABŞ hər zaman terrorçuluğa qarşı beynəlxalq mübarizədə Azərbaycana təşəkkürünü bildirib. 1994-cü ildə Əsrin müqaviləsi bağlanarkən də ABŞ-nin ciddi dəstəyi olub. Yəni iki dövlət arasında münasibətlər ermənilərdən kənar normal müstəvidə gedib. O yerdə ki erməni faktoru daxil olub, həmin anda münasibətlərdə problemlər yaşanıb. Xüsusən son zamanlarda münasibətlərdə ciddi gərginlik var idi. Xatırlayırsızsa, 44 günlük Vətən müharibəsi başlayanda Donald Trampın ilkin reaksiyası belə olmuşdu ki, "orada çox ciddi və maraqlı hadisələr baş verir".
İ.İsmayıl əlavə edib ki, Ermənistana maliyyə yardımının ayrılması məsələsində Donald Tramp əvvəlki Administrasiyadan daha praqmatik davranacaq:
"Tramp özü biznesmen olduğu üçün maliyyə məsələsinə çox həssas yanaşır. Ermənistana maddi yardımın ayrılması Vaşinqtonun maraqlarına uyğun gəlmədiyi təqdirdə Tramp başqa addımlar ata bilər. USAİD-in rəhbəri Samanta Pauerin ayırdığı maliyyə var. Bu ilin aprelin 5-də Brüssel görüşündə ABŞ də iştirak edirdi. Görüşdə Ermənistana maliyyə yardımı üçün nəzərdə tutulmuş 250 milyon dollar məsələsinə yenidən baxıla bilər. Hesab edirəm ki, daha praqmatik addımlar olacaq. Ermənistan üçün maliyyənin kəsilməsi, azalması onlar üçün fəlakətə bərabərdir. Cənab Prezidentin həmkarı Donald Trampı təbrikində xüsusilə vurğulanması lazım olan məqam odur ki, əməkdaşlıq məsələsində Azərbaycan-Ermənistan münasibətlərinin adı çəkilmir. Yəni bu bizim daxili işimizdir və bu məsələyə kimlərinsə hansısa formada müdaxiləsi yolverilməzdir. Seçki ərəfəsində D.Trampın erməni məsələsinə iki dəfə münasibəti gündəmə gəlmişdi. Həmin qüvvələr yenidən "ermənilərin Qarabağa qayıtması" məsələsini qabarda bilərlər. Ona görə də diplomatiyamız bu istiqamətdə preventiv addımlar atmalıdır".
