Putin, həm də Tramp Ukrayna prezidentinə qarşı ritorikasını dəyişmək məcburiyyətində qalıb
Rusiya lideri Vladimir Putin amerikalı həmkarı Donald Trampın bəyanatlarından sonra Ukrayna Prezidenti Volodimir Zelenskiyə qarşı ritorikasını qəfil dəyişib. Bu barədə ABŞ-nin Müharibənin Öyrənilməsi İnstitutu məlumat yayıb. Məlumata görə, fevralın 24-də Kreml jurnalisti Pavel Zarubinə müsahibə verən Putin ilk dəfə Zelenskini Ukraynanın legitim prezidenti kimi tanıyıb. O qeyd edib ki, hərbi vəziyyət şəraitində Ukraynada seçki keçirilə bilməz, bu, Rusiya lideri tərəfindən Ukrayna qanunvericiliyinin ilk ictimai tanınmasıdır. Eyni zamanda Putin Zelenskini Ukrayna cəmiyyəti və ordusu üçün “toksik” adlandıraraq, gələcək istənilən seçkini uduzacağını deyib.
Milli Cəbhə Partiyası başqanının müavini, politoloq Məhəmməd Əsədullazadə isə “Sherg.az”a açıqlamasında deyib ki, Putinin Zelenski ilə bağlı mövqeyinin dəyişməsi Ali Radanın qərarından qaynaqlanır:
“Bir neçə gün əvvələ qədər ABŞ Prezidenti Donald Tramp da Zelenskinin legitimliyini tanımırdı. Ukraynanın Avropa dövlətlərinə təzyiqi və prinsipial mövqe nümayişindən sonra həm Putin, həm də Tramp Ukrayna prezidentinə qarşı mövqeyini dəyişmək məcburiyyətində qaldılar. Putin artıq anlayır ki, Rusiya-Ukrayna müharibəsinin həlli üçün mütləq şəkildə Zelenski ilə danışıqlara getmək lazımdır. Ölkədə keçirilən rəy sorğuları göstərir ki, Zelenskinin reytinqi 60 faizdən yuxarıdır və Ali Rada onun legitimliyini tanıyıb, qanuni prezident kimi fəaliyyətinə razılıq verdi. Fikrimcə, müharibənin ABŞ ilə Rusiya arasındakı danışıqlar fonunda həll edilməsinin mümkünsüz olduğunu anlayan Putin Avropa ölkələri ilə də hesablaşmalı olacaq”.
