Qərbi Azərbaycan İcması ABŞ Dövlət katibi Entoni Blinkenin və digər ABŞ rəsmilərinin Azərbaycanın daxili işlərinə artıq tendensiya halını almış kobud müdaxilə cəhdlərini kəskin şəkildə pisləyib.
Bu barədə Qərbi Azərbaycan İcmasının yaydığı bəyanatda qeyd edilib.
Bəyanatda vurğulanıb ki, ABŞ rəsmiləri torpaqları işğal edilmiş Azərbaycanın, yüz minlərlə məcburi köçkünün, minlərlə itkin ailəsinin deyil, işğalçı Ermənistanın, Azərbaycan cəmiyyətində heç birnüfuzu olmayan, rüsvay olmuş bir qrup marginal elementin yanında yer alıb:
"Təəssüf ki, biz bu illərdə ABŞ-ın Ermənistanın Azərbaycan torpaqlarını işğal etməsini, etnik təmizləmə siyasəti həyata keçirməsini, biz Qərbi azərbaycanlıları deportasiya etməsini pislədiyini görmədik. ABŞ rəsmiləri torpaqları işğal edilmiş Azərbaycanın, yüz minlərlə məcburi köçkünün, minlərlə itkin ailəsinin deyil, işğalçı Ermənistanın, Azərbaycan cəmiyyətində heç birnüfuzu olmayan, rüsvay olmuş bir qrup marginal elementin yanında yer aldı. Vətən müharibəsindən sonra bütün bunların, xüsusilə ölkələrin ərazi bütövlüyü və suverenliyinə münasibətdə ABŞ-ın fərqli yanaşmasının bir daha şahidi olduq. ABŞ-ın dinc yolla öz dədə-baba yurdlarına qayıdış xəttini seçən Qərbi Azərbaycan İcmasının elə həmin Entoni Blinkenə ünvanladığı məktuba heç bir reaksiya vermədiyini, lakin Azərbaycan xalqına qarşı etnik təmizləmə siyasətinin həyata keçirilməsində iştirak edən və bu günün özündə də Ermənistanda Azərbaycanın suverenliyini təhdid edən separatçılara qucaq açdığını, viza verdiyini, ABŞ-ın müxtəlif təsisatlarında çıxış etmək imkanı yaratdığını gördük".
Qeyd edilib ki, ABŞ Azərbaycan cəmiyyətində olan-qalan nüfuzunu da itirib:
"Özünü dini azadlıqlara hörmət edən ölkə kimi qələmə verən, “mötəbər” hesabatlar hazırlayaraq ölkələri müxtəlif uydurma siyahılara daxil edən, Qarabağda “erməni irsi”nin vəziyyəti ilə bağlı narahatçılığını ifadə edən ABŞ-nin Azərbaycan xalqının Ermənistan ərazisində zəngin mədəni irsinin dağıdılmasını, təhrif edilməsini pislədiyini eşitmədik. Bütün bunlara görə də, ABŞ Azərbaycan cəmiyyətində olan-qalan nüfuzunu da itirdi. ABŞ “insan hüquqları” mövzusunu, yalan xəbər mediasını, “müstəqil” QHT-ləri Azərbaycana qarşı silah kimi istifadə etməkdənsə, qoy özü ən əsas beynəlxlaq insan hüquqları konvensiyalarına qoşulsun".
Bundan başqa, İcma ABŞ-ı müxtəlif beynəlxalq təşkilatların çoxsaylı hesabatlarında yer almış polis tərəfindən həddindən artıq gücün tətbiq edilməsinə, hüquq-mühafizə orqanlarının irqi əsasda məlumatlar toplaması (racial profiling), strukturlaşdırılmış irqçilik kimi praktikalara son qoymağa çağırıb, silah zorakılığı problemini həll etməyi, məhbuslara verilən işgəncə hallarını və digər qanunsuz əməlləri araşdırmağa çağırıb.
Politoloq İlyas Hüseynov "Sherg.az"a deyib ki, ABŞ Dövlət Departamenti Azərbaycana qarşı qərəzli münasibətini davam etdirir:
"Bayden administrasiyası dövründə ABŞ-ın Azərbaycana qarşı olan ədavətinə dəfələrlə şahidlik etdik. Eyni zamanda digər təşkilatların sülh və vətəndaş cəmiyyətinin inkişafı adı altında Ermənistana səxavətli maliyyə yardımları oldu. Həmçinin hərbi cəhətdən əməkdaşlıq imkanları üzərində Vaşinqton və İrəvan yaxınlaşmasını görmüşük. Bu da təəssüf doğuran məsələdir. Digər tərəfdən, insan haqları müstəvisində Azərbaycanı tənqid etmək tamamilə yolverilməzdir. Azərbaycan icmasında bəyanatda da qeyd olunduğu kimi, 100 minlərlə məcburi köçkünün, minlərə itkin ailəsinin qeydinə qalmaq əvəzinə işğalçı Ermənistana dəstək ifadə olunması tamamilə məntiqdən kənardır. Qeyd edək ki, ABŞ-ın yeni administrasiyası Trampın dönəmində ABŞ və Azərbaycan münasibətləri dəyişəcək. Həmçinin köklü transformasiyaya nail olunacaq. Çünki bizim üçün Bakı ilə Vaşinqton arasında strateji tərəfdaşlıq, beynəlxalq sülh, təhlükəsizlik, "Yaşıl" enerji sahəsində əməkdaşlığın formalaşması və dərinləşməsi prioritet təşkil edir. ABŞ ilə münasibətlərdə proqnozlaşdırılan addımların atılması önəm kəsb edir. Eyni zamanda qarşıdakı dönəmdə də bu münasibətlər yeni səhifədən başlayacaq".
