ABŞ İrəvan və Bakı ilə tərəqqi təmin edə biləcək istənilən formatda işləməyə hazırdır.
Bu barədə “Amerikanın səsi”nə ABŞ Dövlət Departamentindən bildirilib. “Birləşmiş Ştatlar hökuməti Cənubi Qafqazın təhlükəsiz və firavan olması üçün vacib olan uzunmüddətli və ləyaqətli sülh sazişinin əldə edilməsi istiqamətində Ermənistan və Azərbaycanın səylərini dəstəkləyir. Biz tərəflərin razılıq əldə etməsi üçün hər iki tərəflə istənilən formatda işləməyə hazırıq”, - açıqlamada qeyd edilib.
Qeyd edək ki, ötən ilin oktyabrında ABŞ Dövlət Departamentinin sözçüsü Metyu Miller X Platformasında paylaşım etmişdi ki, ABŞ Azərbaycanın və Ermənistanın sərhədlərin delimitasiyası ilə bağlı prosedur qaydalarını rəsmiləşdirmək qərarını alqışlayır.
Onun sözlərinə görə, Azərbaycan və Ermənistanın sərhədlərin delimitasiyası ilə bağlı prosedur qaydaları rəsmiləşdirməsi davamlı dialoq vasitəsilə tərəqqinin mümkün olduğunu nümayiş etdirir.
Siyasi şərhçi Kazım Kazımov "Sherg.az"a bildirib ki, ABŞ hər zaman Qarabağ məsələsində qərəzli siyasət aparıb:
"907-ci düzəlişdən etibarən kollektiv Qərbin ədalətsiz davranışını görürük. İstər İrəvanın Moskva ilə çox yaxın əlaqələr qurduğu, hətta vassallıq əlaqələri zamanı, istərsə də Nikol Paşinyan dövründə Qərbin Azərbaycana qarşı qərəzli mövqe sərgiləyib. Digər tərəfdən Dövlət Departamentindən belə bir açıqlama gəlməsi ondan xəbər verir ki, ABŞ Cənubi Qafqaz regionunda hələ də çox maraqlıdır. Həmçinin sülh məsələsi üzərindən öz gücünü sınamaq və nüfuzunu artırmaq istəyir. Amma artıq buna ehtiyac yoxdur. Çünki Azərbaycan bu gün bütün parametrlər üzrə Ermənistanı üstələyib. Eyni zamanda İrəvan heç vaxt müstəqil hərəkət etməyib. Bu baxımdan da sülhün imzalanmasında vasitəçilərin kim olması o qədər də önəmli deyil. Hamı bilir ki, İrəvan Qərbdən aldığı əmrləri həyata keçirir. Ermənistanın niyyəti təmiz olarsa, iki ölkənin - Ermənistan və Azərbaycanın liderləri də danışıqları reallaşdıra bilər. Lakin təəssüflər olsun ki, Prezident İlham Əliyevin göstərdiyi konstruktiv mövqeyi Nikol Paşinyandan görə bilmirik".
