Dünyada baş verən siyasi dəyişikliklər ölkələr arasında münasibətlərə də təsir göstərir. Xüsusilə ABŞ-da Respublikaçıların hakimiyyətə gəlməsi onun xarici siyasətinə də yeni yanaşmalar gətirib. Donald Trampın yenidən hakimiyyətə qayıtması ABŞ-nin Cənubi Qafqaz siyasətində də dəyişikliklərə səbəb olub.
Onun Azərbaycanla bağlı fikirləri, Prezident İlham Əliyevə ünvanladığı məktub və Azərbaycanın bölgədəki rolu münasibətlərin yenidən inkişaf etməsinə zəmin yaradıb. Tramp administrasiyasının regiona baxışı və Azərbaycanla əməkdaşlıq məsələsinə yanaşması bu istiqamətdə yeni perspektivlər vəd edir.
Sherg.az-a açıqlama verən politoloq Məhəmməd Əsədullazadə ABŞ-Azərbaycan münasibətləri, iki ölkə arasında mümkün əməkdaşlıq sahələri və perspektivlərdən danışıb:
"Respublikaçılar Ağ evə gələndə Azərbaycanla olan münasibətlərə xüsusi önəm verirlər. Donald Tramp da Prezident İlham Əliyevə göndərdiyi məktubda Azərbaycanın ərazi bütövlüyünü və suverenliyini dəstəkləyəcəyini vurğuladı. Azərbaycan prezidenti ilə işləyəcəyinin də mesajını verdi. Bu məktubdan da görünür ki, Donald Trampın ümumi Qafqaza baxışı loyaldır və Azərbaycanla əməkdaşlığa açıqdır.
Azərbaycanın Cənubi Qafqazda həyata keçirdiyi siyasət, regional gücə çevrilməsi, eləcə də İsraillə strateji tərəfdaşlığı Tramp yüksək qiymətləndirir. Bu baxımdan düşünürəm ki, ABŞ və Azərbaycan arasında, Bayden administrasiyası dövründə müşahidə olunan gərginliklər Tramp dövründə yaşanmayacaq".
Ekspert ABŞ-nin bu dəfə insan haqları, demokratiya və digər daxili məsələləri bəhanə edərək Azərbaycana təzyiq göstərməyəcəyini bildirib:
"ABŞ eyni zamanda Ermənistanı hərbi və siyasi baxımdan dəstəkləmək siyasəti də aparmayacaq. Sülhün əldə olunması üçün daha obyektiv və balanslı mövqe nümayiş etdirəcək.
Azərbaycan da öz növbəsində ABŞ ilə münasibətlərin normallaşdırılmasında maraqlıdır və əlaqələrin yüksək səviyyədə olması üçün çalışır. Bu siyasət gələcəkdə də davam etdiriləcək.
Nəticə etibarilə, ABŞ və Azərbaycan arasında münasibətlərdə ciddi problemlər yaşanmayacaq. Enerji, iqtisadiyyat və təhlükəsizlik sahələrində də əməkdaşlıq davam edəcək.
Yeni dünya siyasi nizamı formalaşarkən, Azərbaycanın regiondakı strateji rolu ABŞ-nin də diqqətini çəkir. Mərkəzi Asiyaya açılım siyasəti və ABŞ-nin regiondakı maraqları Trampın Azərbaycanla əməkdaşlıq qurmasını daha da vacib edib".
Politoloq ABŞ-Azərbaycan əməkdaşlığının gələcəkdə də davam etdiriləcəyini vurğulayıb.
