Yollar açıldıqdan sonra Naxçıvanın imkanları daha da genişlənəcək
"Naxçıvan çox mühüm strateji zonadırq".
Bunu Naxçıvanda Avropa İttifaqının (Aİ) Cənubi Qafqaz üzrə xüsusi nümayəndəsi Maqdalena Qrono deyib.
O bildirib ki, Azərbaycan Prezidenti İlham Əliyevin və Ermənistanın Baş naziri Nikol Paşinyanın qarşılıqlı səyləri nəticəsində sülh və normallaşma prosesində yeni mərhələyə qədəm qoymuşuq: “Bu dövr Azərbaycan və Ermənistan arasında tammiqyaslı normallaşma, eyni zamanda bütün regionun inkişafı üçün yeni imkanlar yaradır. Naxçıvan çox mühüm strateji zonadır. Burada uzun illər bağlı qalmış yolların açılması təkcə Azərbaycan və Ermənistana deyil, bütün region ölkələrinə fayda verəcək. Bu, kommunikasiya və regional əlaqələrin inkişafı baxımından olduqca vacibdir”.
O, həmçinin bölgənin turizm potensialını yüksək qiymətləndirdiyini bildirib: “Naxçıvanın böyük turizm potensialı mövcuddur. Zənnimcə, avropalıların bu inanılmaz gözəlliyi görmələri çox yaxşı olardı”.
Milli Məclisin deputatı Asim Mollazadə Sherg.az-a deyib ki, Aİ nümayəndəsinin Naxçıvanla bağlı açıqlamaları tam həqiqəti əks etdirir:
"Naxçıvanın çox böyük və mühüm rolu var. Söhbət yalnız dəhlizdən getmir. Nəqliyyat və kommunikasiya sistemləri önəmlidir. Aİ-nin diqqətini cəlb edən əsas məsələlər də məhz bunlardır. Eyni zamanda Naxçıvanın çox böyük turizm potensialı var. Tarixi baxımdan Naxçıvan qədim sivilizasiyaların beşiyi hesab olunur. Bundan başqa, Naxçıvanda bir sıra təbii möcüzələr mövcuddur. Yollar açıldıqdan sonra Naxçıvanın imkanları daha da genişlənəcək. Avropa Birliyi ölkələri də daxil olmaqla dünyanın müxtəlif ölkələrindən bura turist axını başlaya bilər. Üstəlik, sənaye potensialı da mövcuddur. Aİ nümayəndəsinin fikirləri gələcək inkişaf üçün həqiqəti əks etdirir".
