Azərbaycan-Pakistan strateji tərəfdaşlığı tarixi, siyasi, iqtisadi və hərbi sahələrdə dərin əlaqələrə əsaslanır. Hər iki ölkə beynəlxalq arenada bir-birini dəstəkləyir və dostluq münasibətlərini strateji səviyyəyə yüksəldib. Azərbaycan və Pakistan arasında diplomatik münasibətlər 1992-ci ildə qurulub. Pakistan, Azərbaycanın müstəqilliyini tanıyan ilk ölkələrdən biri olub və Ermənistanın işğal etdiyi torpaqlarla bağlı daim Azərbaycanın mövqeyini dəstəkləyib. Hətta Pakistan Ermənistanı rəsmi olaraq tanımır. Qarabağ müharibəsi zamanı və 44 günlük Vətən müharibəsində Pakistan Azərbaycana siyasi və mənəvi dəstək göstərib. Azərbaycan və Pakistan arasında hərbi əməkdaşlıq strateji tərəfdaşlığın əsas istiqamətlərindən biridir. Pakistan dünyada nüvə silahına sahib olan azsaylı müsəlman ölkələrdən biridir və onun hərbi sənaye sahəsindəki təcrübəsi Azərbaycanın maraq dairəsindədir. Hər iki ölkənin orduları arasında təlimlər və texniki əməkdaşlıq həyata keçirilir. Azərbaycan Pakistanın istehsalı olan hərbi texnika və silahlarla maraqlanır, o cümlədən JF-17 qırıcı təyyarələri və digər müasir silah sistemləri üzrə danışıqlar aparılır.
“Müstəqil Mətbuat Mərkəzi" İctimai Birliyinin sədri, politoloq Elçin Xalidbəyli “Sherg.az”a söyləyib ki, Pakistan Azərbaycanın ən yaxın dostlarından biridir və strateji müttəfiq hesab olunacaq dövlətdir:
“Azərbaycanla Pakistan arasında uzun illərdir strateji tərəfdaşlıq münasibətləri mövcuddur və inkişaf etməkdədir. Pakistan Qarabağ probleminin yarandığı gündən bəri Azərbaycanın mövqeyini dəstəkləyir və Ermənistanla əlaqələr qurmağa qətiyyən həvəs göstərmir. Bütün beynəlxalq platformalarda birmənalı şəkildə Azərbaycanın yanında olduğunu göstərir. Bu baxımdan Azərbaycan üçün Pakistan Türkiyə qədər önəmli dövlərdir. Pakistanın Azərbaycana verdiyi mənəvi dəstək əvəzolunmazdır. Yaxın gələcək də iki ölkə arasında hərbi, siyasi və strateji istiqamətlərdə tərəfdaşlıq davam edəcək. Xüsusilə də yeni dünya düzəninin qurulduğu bir dövrdə Pakistanın Azərbaycanın yanında yer alması ölkəmiz üçün böyük əhəmiyyət daşıyır. Azərbaycan və Pakistan arasında hərbi əməkdaşlıq da mövcuddur. Bəzi məlumatlara görə hər iki ölkə biri-birinə hərbi sahədə də dəstək vermək niyyətlərini büruzə verirlər. Hərbi təlimlərin keçirilməsi və hərbi texnika ticarətiylə bağlı iki ölkə arasında yaxın münasibətlərin olduğu heç kəsə sirr deyil. Pakistanla olan strateji tərəfdaşlığa dəyər vermək Azərbaycan üçün önəmlidir”.
