İran İslam Respublikası balanslı və dinamik diplomatiyaya, ölkələrin suverenliyinə və ərazi bütövlüyünə hörmətə önəm verib.
Teleqraf xəbər verir ki, bunu İranın Azərbaycandakı səfirliyinin müvəqqəti işlər vəkili Seyid Cəfər Ağayi Məryan ölkəsinin Milli Günü münasibətilə Bakıda təşkil olunan rəsmi qəbulda deyib.
O bildirib ki, İran qonşuları ilə xüsususən, dost və qardaş ölkə Azərbaycanla güclü və mehriban münasibətə diqqət yetirib.
"Hamımız bilirik ki, Azərbaycanla İran arasındakı qardaşlıq və dostluq bağları bir çox tarixi, mədəni-dini və ənənəvi ortaq cəhətlərə, adət-ənənələrə görə əbədi bir bağdır və həmişəlikdir", - Seyid Cəfər Ağayi Məryan vurğulayıb.
Müvəqqəti işlər vəkili əlavə olaraq qeyd edib ki, iki ölkə arasındakı birgə layihələr, o cümlədən Şimal-Cənub dəhlizi, Araz dəhlizi, yeni Astara sərhəd keçid məntəqəsi və terminalı Ağbənd-Kəlalə körpüsünün tikintisi və s. kimi infrastruktur və nəqliyyat sektorlarında həyata keçirilən layihələr, İranla Azərbaycan arasındakı iqtisadi sahələrdə əməkdaşlıq üçün böyük potensialın mövcudluğundan xəbər verir.
