“Türkiyə ilə hərbi ittifaq qururuq və Rusiyanın işğalçı Ermənistana dəstək verdiyini deyirik, amma...”
“Digər tərəfdən rus hərbi gəmisini təmtəraqla qarşılayırıq. Bu, çox böyük ziddiyətdir”
Rusiya Hərbi Dəniz Donanması (HDD) Bakıya gəlib. Məqsəd Azərbaycanın Xəzər dənizindəki ərazi sularında “Beynəlxalq Ordu Oyunları-2020” yarışları çərçivəsində keçiriləcək “Dəniz Kuboku” müsabiqəsində iştirak etməkdir.
Lakin bu durum cəmiyyətdə birmənalı qarşılanmayıb. Xüsusilə Tovuzda baş verənlər, Rusiyanın Ermənistana silah göndərməsi xalqımızda ruslara qarşı bir qəzəb hissi oyadıb. Məhz bu səbəbdən rus hərbi gəmisinin qarşılanma törəni, ümumiyyətlə rusların Bakıya gəlməsi lazımsız hesab edilir.
Baş verənləri “Sherg.az”a dəyərləndirən “Atlas” Araşdırmalar Mərkəzinin sədri, politoloq Elxan Şahinoğlu da rus hərbi gəmisinin təmtəraqla qarşılanmasının düzgün olmadığını düşünür:
“Ölkə başçısı rusiyalı həmkarı Putinə narazılığını bidirib. Rusiya Ermənistana 400 ton silah və sursat daşıyıb. Proses yenə də davam edir. Amma biz Rusiya hərbi gəmilərini gülüb-oynayaraq qarşılayırıq. Bu, doğru yanaşma deyil. Heç olmasa bu il həmin hərbi yarışlardan imtina etmək olardı”.
Analitik vurğulayıb ki, bu il rus hərbi gəmisi Bakı limanına lövbər salmasaydı, dünya dağılmayacaqdı:
“Yarışlardan imtina etməli idik. Onda ciddiyyətimizi ortaya qoyardıq. Belə qarşılanma mərasimi imicimizə böyük zərər vurur.
Türkiyə ilə hərbi ittifaq qururuq, türk hərbi bazasının Azərbaycanda yerləşməsini istəyirik və Rusiyanın işğalçı Ermənistana dəstək verdiyini deyirik. Digər tərəfdən rus hərbi gəmisini təmtəraqla qarşılayırıq. Bu, çox böyük ziddiyətdir”.
