Azərbaycanda geodeziya və kartoqrafiya işlərində vahid beynəlxalq koordinat sistemi tətbiq olunacaq.
Sherg.az xəbər verir ki, bununla bağlı Prezident İlham Əliyev Sərəncam imzalayıb.
Sərəncama əsasən, Azərbaycanın ərazisində təyinatından asılı olmayaraq yerinə yetirilən bütün növ geodeziya, qravimetriya, topoqrafiya, kartoqrafiya və kadastr işlərində beynəlxalq WGS-84 (beynəlxalq koordinat sistemi) koordinat sistemi və UTM (xəritə proyeksiyası) proyeksiyası tətbiq ediləcək.
Sərəncamda qeyd olunur ki, bu qərar Azərbaycan geodeziya və kartoqrafiya sahəsinin dünya geodeziya şəbəkəsinə inteqrasiyası və koordinat sistemində vahidliyin təmin olunması məqsədilə qəbul edilib.
Bununla yanaşı, digər koordinat sistemləri ilə artıq icrasına başlanılmış və hələ tamamlanmamış layihələr üzrə işlər əvvəlki sistemlər əsasında başa çatdırıla bilər.
Nazirlər Kabinetinə isə bu sərəncamdan irəli gələn məsələlərin həlli tapşırılıb.
