Ədalət Partiyasının Qafqaz Biznes Mərkəzində IX Qurultayı keçirilir. Qurultayda ölkədə mövcud olan siyasi partiyalar, qeyri-hökumət təşkilatlarının və media strukturlarının təmsilçiləri qonaq qismində iştirak edir.
Teleqraf xəbər verir ki, 121 nəfər qurultay nümayəndəsi və ümumilikdə 200 nəfərə yaxın şəxsin iştirakı ilə keçirilən qurultay Dövlət Himninin səslənməsi, partiyanın keçmiş sədri, mərhum İlyas İsmayılov və şəhidlərin ruhunun bir dəqiqəlik sükütla yad olunması ilə başlayıb.
Əvvəlcə IX Qurultaya hazırlıq üzrə Təşkilat Komitəsinin sədri Mütəllim Rəhimli və Mərkəzi Nəzarət Təftiş Komissiyasının sədri Çingiz Abbasovun məruzəsi dinlənilib.
Daha sonra məruzə ətrafında müzakirələr aparılıb.
Qurultayda, həmçinin seçkili orqanların hesabatları dinlənilib qiymətləndiriləcək.
Ədalət Partiyasının sədri, Mərkəzi Nəzarət Təftiş Komissiyasının üzvləri və Ali Məclisin üzvlərinin 1/3-i seçiləcək.
Həmçinin partiyanın 56 rayon təşkilatının 54-nün qurultaya nümayəndələri seçilib və protokoldan çıxarışları təqdim olunub.
Qeyd edək ki, bu Ədalət Partiyasının sədri İlyas İsmayılovun vəfatından sonra ilk qurultaydır.
Xatırladaq ki, Ədalət Partiyasının sədri, keçmiş Baş prokuror, sabiq ədliyyə naziri İlyas İsmayılov 2025-ci il fevralın 17-də 87 yaşında vəfat edib. Bundan sonra partiya daxilində gərginlik yaranıb. Nəticədə Ədalət Partiyası Ali Məclisinin sədri Meydan Babayev, onun birinci müavini Elçin Qurbanov, Siyasi Şura üzvləri Vüsalə Dadaşova, İlham Hüseyn və Mehman Əliyev siyasi təşkilatdan istefa veriblər.
