Azərbaycan Respublikası 13 illik fasilədən sonra Suriyanın paytaxtı Dəməşqdəki Səfirliyinin fəaliyyətini bərpa edib. Bu barədə Azərbaycan Xarici İşlər Nazirliyi məlumat yayıb. Bildirilib ki, artıq bu məqsədlə Səfirliyin müvəqqəti işlər vəkili artıq Dəməşq şəhərinə ezam edilib və fəaliyyətə başlayıb.
"Azərbaycan Respublikası beynəlxalq hüququn prinsiplərinə əsaslanaraq, Suriyada davamlı sülhün və sabitliyin bərqərar olmasını dəstəkləyir. Məlumatda qeyd olunub ki, Azərbaycan və Suriya arasında dostluq və əməkdaşlıq əlaqələrinin keyfiyyətcə yeni mərhələyə qədəm qoyması və siyasi, iqtisadi, mədəni və digər sahələrdə tərəfdaşlığın inkişaf etdirilməsi üçün yeni imkanların yarandığı bu vacib dövrdə Səfirliyimiz Suriyanın keçid dövrü hökuməti ilə yaxından əməkdaşlıq edərək ikitərəfli əlaqələrimizin inkişafına dəstək verəcəkdir.
Milli Məclisin deputatı Elçin Mirzəbəyli “Sherg.az”a söyləyib ki, Dəməşq şəhərində Azərbaycan Respublikasının müvəqqəti işlər vəkilinin fəaliyyətə başlaması önəmli hadisədir:
“Hər kəsə məlum olduğu kimi Suriya və Azərbaycan münasibətlərində uzun müddət fasilə var idi. Suriyada baş verən hadisələr nəticə etibarilə ölkənin ciddi təlatümlərlə müşahidə edilən prosesə məruz qalmasına zəmin yaratdı. Eyni zamanda ölkənin xeyli hissəsi dağıdılıb, günahsız insanlar qətlə yetirilib. Bütün baş verənlərdən sonra Suriya ilk dəfə dövlət olaraq dirçəlməkdədir. Azərbaycan da qardaş Türkiyə ilə yanaşı bu prosesin içərisində yer alır və Suriyada dövlət idarəçilik strukturlarının yenidən bərpasından sonra ilk dəstək göstərən ölkələrdən biridir. Ümumiyyətlə Azərbaycan Türkiyə ilə bir çox məsələlərdə olduğu kimi Suriya mövzusunda da sinxron hərəkət edir. Bu həm də iki ölkənin milli maraqlarından irəli gələn bir məsələdir və mühim əhəmiyyətə malikdir. Eyni zamanda Şuşa bəyannaməsində də Azərbaycanla Türkiyənin bir çox istiqamətlərdə birgə fəaliyyəti nərəzdə tutulub ki, onlardan biri də xarici siyasət məsələlərində ortaq milli maraqlara söykənən mövqenin nümayiş etdirilməsidir. Bu aspektən düşünürəm ki, Azərbaycan da qardaş Türkiyə ilə yanaşı Suriya dövlət strukturların fəaliyyətinin tam bərpa edilməsində, idarəçilik sisteminin formalaşmasında aktiv iştirak edə bilər. Eyni zamanda Suriyanın yenidən dirçəldilməsi prosesinə öz dəstəyini göstərər”.
E.Mirzəbəyli qeyd edib ki, Suriya bizim üçün uzaq dövlət deyil, statistik göstəricilərə görə həmin ölkədə üç milyon türkmən yaşayır:
“Onlar bizimlə eyni mədəniyyətin, dilin daşıyıcılarıdır. Azərbaycan xalqının bəşəriyyətə verdiyi ən böyük simalardan biri olan Nəsiminin məzarı məhz Suriyada yerləşir. Suriya və Azərbaycanı doğmalaşdıran həm də belə mədəni körpülərdir. Fikrimcə, bu mədəni körpülər üzərindən də iki ölkə arasındakı əlaqələrin inkişafına töhfə vermək olacaq. Azərbaycan prezidenti İlham Əliyev Suriyanın yeni lideri Əhməd əş-Şəraanın fəaliyyətə başlaması ilə bağlı ona ünvanladığı məktubda prezidenti ölkəmizə dəvət etmişdi. Sözügedən səfərin reallaşacağına ümid bəsləyirəm. Şübhəsiz ki, iki ölkə arasında qarşılıqlı əlaqələr, eyni zamanda diplomatik nümayəndəliyimizin Suriya fəaliyyətə başlaması münasibətlərin daha da genişlənməsinə səbəb olacaq”.
