Ermənistan Kollektiv Təhlükəsizlik Müqaviləsi Təşkilatının (KTMT) 2024-cü il büdcəsini imzalamamaq qərarına gəlib. Bu barədə Ermənistan Xarici İşlər Nazirliyindən "Sputnik Ermənistan"a bildirilib. Nazirlik təsdiqləyib ki, İrəvan KTMT katibliyini maliyyələşdirmədə iştirak etməyəcəyinə dair rəsmi şəkildə xəbərdarlıq edib. Qurum əlavə edib ki, təşkilatın daxili prosedurlarına görə, illik büdcə ilə bağlı məlumat ictimaiyyətə açıqlanmır. Bundan əvvəl Rusiya xarici işlər nazirinin müavini Aleksandr Pankin bildirib ki, Ermənistan 2025-ci ilin sonuna qədər üzvlük haqqını ödəməsə, KTMT-yə üzv dövlətlər vəziyyətin inkişafı üçün müxtəlif ssenariləri nəzərdən keçirə bilər.
Politoloq Kazım Kazımov “Sherg.az”a bildirib ki, Ermənistan və KTMT arasında münasibətlər uzun illərdir gərgindir:
“Bunun əsas səbəbi 2018-ci ildə Ermənistanda hakimiyyət dəyişikliyi ilə yanaşı dövlət siyasətinə müəyyən fərqlərin gəlməsidir. Nikol Paşinyan Rusiya ilə arasına məsafə qoymağa çalışdı. 2020-ci il bu məsafəyə rəğmən Qarabağ müharibəsində KTMT-nin Azərbaycana müdaxilə etməsini istədi. KTMT isə hüquqi olaraq Azərbaycana müdaxilə edə bilməzdi. Çünki Azərbaycan hərbi əməliyyatları öz torpaqlarında həyata keçirirdi. Ola bilsin ki, Ermənistan belə davranışla KTMT-dən uzaqlaşmaq üçün taktika işlədirdi. Qarabağ müharibəsindən sonrakı dövrlərdə Ermənistan ordusundakı bir çox Nikol Paşinyanın xoşuna gəlməyən hallardan yana KTMT ilə İrəvan arasında inciklik daha da sərtləşib. Nikol Paşinyan bir neçə dəfə KTMT-nin iclaslarına qatılmayıb. KTMT-nin fəaliyyətləri ilə bağlı ciddi narazılıqlarını dilə gətirmişdi. İndiki şəraitdə də Nikol Paşinyan KTMT ilə bağlı mövqeyini sərtləşdirib. Nikol Paşinyan KTMT-yə Ermənistana yetəri qədər dəstək vermədikləri üçün təşkilatın büdcəsini imzalamıram şəklində mesaj verir. Lakin Ermənistan KTMT-dən çıxsa, onun qoşula biləcəyini heç bir hərbi blok yoxdur. Ona görə də düşünürəm ki, Ermənistan KTMT üzvlüyünü davam etdirəcək”.
