Nə Qərblə anlaşa bilirlər, nə də regionda gedən siyasi proseslərlə ayaqlaşırlar
“Gürcüstan Moskvadan asılı siyasət aparır”. Bunu siyasi ekspert Məhəmməd Əsədullazadə Sherg.az-a açıqlamasında deyib.
Gürcüstanın Cənubi Qafqazda gedən geosiyasi proseslərdən kənarda qaldığını vurğulayan ekspert qeyd edib ki, Orta Dəhlizin əsas seqmenti olan Zəngəzur dəhlizinin açılması ilə Gürcüstanın izolyasiya olunmasına gətirib çıxaracaq:
“Oliqarx və Rusiyanın adamı B.İvanaşvilinin nəzarətində olan Gürcü Arzusu hökuməti nə Qərblə anlaşa bilir, nə də regionda gedən siyasi proseslərlə ayaqlaşır. Moskvadan gələn narrativlərlə hərəkət edir. Gürcü Arzusu hökuməti Cənubi Qafqazda Rusiyanın əsas dayağı kimi çıxış edir. Azərbaycan üçün Gürcüstanın Rusiya ilə deyil, Qərblə əməkdaşlığı daha vacibdir. Amma gürcü hökuməti guya müstəqil siyasət apardığını elan edib. Ümumiyyətlə, bir ölkənin müstəqil və manevr siyasəti üçün onun iqtisadiyyatı və resursları olmalıdır”.
M.Əsədullazadə hesab edir ki, Gürcüstan hökuməti, Rusiyanın təlimatı ilə hərəkət etməklə, 15 il ərzində formalaşmış demokratik sistemi dağıdır. Yaxın perspektivdə Gürcüstan Şimal-Cənub və Şərq-Qərb marşrutundan tam məhrum olacaq. Çünki Tbilisidə oturan hökumət Kremlin göstərişi ilə hərəkət edir.
