İranın xarici işlər naziri Abbas Əraqçi bu yaxınlarda ölkənin Stokholmdakı səfirliyinə qarşı törədilən yanğını pisləyib və İsveç hökumətini bu cür cinayət əməllərinin təkrarlanmasının qarşısını almağa çağırıb.
Teleqraf xəbər verir ki, bu barədə "Mehr" agentliyi məlumat yayıb.
Qeyd olunur ki, İranın xarici işlər naziri və onun isveçli həmkarı Mariya Malmer Stenerqaard telefon danışığı zamanı bir sıra ikitərəfli məsələləri müzakirə ediblər.
Əraqçi son günlərdə Stokholmdakı İran səfirliyinə qarşı törədilən yanğını pisləyərək, İsveç hökumətini hadisəyə görə məsuliyyət daşıyanlara qarşı ciddi tədbirlər görməyə və belə hücumların təkrarlanmaması üçün lazımi tədbirlər görməyə çağırıb. O həmçinin anlaşılmazlıqlara aydınlıq gətirmək və qarşılıqlı əməkdaşlığı gücləndirmək üçün İran və İsveç arasında daha sıx məsləhətləşmələrin aparılmasının vacibliyini vurğulayıb.
Öz növbəsində, Malmer Stenerqaard İsveçin diplomatik obyektlərin mühafizəsinə sadiqliyini təsdiqləyib və əmin edib ki, Stokholm İran səfirliyinin təhlükəsizliyini təmin etmək üçün lazımi tədbirlər görəcək.
Qeyd edək ki, 30 aprel 2025-ci ildə İsveçin Stokholm şəhərində İran səfirliyinin binası qarşısında yanğın törədilib. Yanğın az sonra binaya keçib və tez bir zamanda söndürülüb.
İsveç polisi hadisənin qəsdən törədildiyini və bununla əlaqədar 55 yaşlı şübhəli şəxsin həbs edildiyini bildirib.
