Azər Qasımov: "Bunun üçün prezidentin bəhanəsi çoxdur. Rusiyanın da ona yardım edəcəyi şübhəsizdir"
Belarus Prezidenti Aleksandr Lukaşenko ABŞ və Avropanı ölkədə etiraz aksiyalarının təşkil edilməsində ittiham edib. Onun sözlərinə görə, hər şey Vaşinqton tərəfindən planlaşdırılaraq istiqamətləndirilir, avropalılar isə dəm tuturlar. Varşava ətrafında xüsusi mərkəzin yaradıldığını vurğulayan Lukaşenko bildirib ki, prosesə nəzarət edilir:
“Qərb ölkələri Belarusdan Rusiyaya qarşı istifadə etməyə cəhd edirlər. Bizə bu tələni hazırlayıblar və Rusiya bizi itirməkdən qorxub. Qərb bizi Rusiyaya qarşı qoymaq istəyir.
Hazırda onlar Baltik-Qara dəniz dəhlizini, üç Baltikyanı ölkə, bizim və Ukraynanın olduğu sanitar kordonu yaratmaq istəyirlər. Burada bir həlqə kimi qalmışıq”. Bu arada prezident seçkilərində namizəd olmuş Svetlana Tixanovskaya Belarusu sevdiyini və özünü təhlükəsiz hiss edəndə yenidən ora qayıdacağını deyib.
Tixanovskaya dinc etirazları dəstəklədiyini və hakimiyyətlə dialoqa ümid etdiyini bildirib: “Mən həqiqətən ümid edirəm ki, xalqın səsi eşidiləcək, hakimiyyət dialoqa gedəcək və yeni ədalətli seçkilər keçiriləcək”. Müxalifətin hədəfləri ilə bağlı suala cavabında Tixanovskaya qeyd edib ki, zorakılıq dayandırılmalı, siyasi məhbuslar azad edilməli və seçkilər yenidən keçirilməlidir. Tixanovskaya Moskvadan onunla əlaqə yaratmaq üçün cəhd edilmədiyini söyləyib.
Belarusdakı olayları “Şərq”ə dəyərləndirən siyasi şərhçi Azər Qasımovun sözlərinə görə, ölkədə proseslər süni şəkildə şişirdilir. Analitik bildirib ki, etirazçılar seçkidə saxtakarlıq olduğunu iddia edərək mitinqlər təşkil etsələr də, Lukaşenko qəti olaraq istefa verməyəcəyini, ancaq onun ölümündən sonra bunun mümkün olacağını deyib:
“Belarusda Rusiya və NATO tərəfindən çox böyük oyunlar gedir. NATO Polşa və Pribaltika ölkələrinin təhlükəsizliyini qorumaq üçün həmin ərazilərə hərbi qüvvə yığıb.
Rusiyanı öz sərhədlərinə doğru sıxmaq, hər tərəfdən mühasirəyə almaq NATO-nun strateji planıdır. Bu baxımdan Qərb Belarusdakı hadisələrin gərginləşməsində maraqlıdır.
Amma onlar da Belarusda hadisələrin qarşıdurma səviyyəsinə çatmasını istəmirlər. Qərb yaxşı bilir ki, qarşıdurma Rusiyanın Belarusa ordu yeritməsinə şərait yaradar.
Moskvanın bundan məharətlə istifadə edəcəyi şübhəsizdir. Bu baxımdan etirazlar dinc şəkildə davam edir. Lakin Lukaşenkonun aksiyalara uzun müddət səbr göstərəcəyinə ehtimal vermirəm.
Tezliklə etirazlar sakitləşməsə, Lukaşenkonun güc tətbiq edəcəyini düşünürəm. Bunun üçün prezidentin bəhanəsi çoxdur. Rusiyanın da ona yardım edəcəyi şübhəsizdir”.
