“Postunda uzun müddət otura bilməyəcək”
“Demokratik dünya Belarus seçkilərini tanımadı və ölkə ciddi sanksiyalarla üzləşə bilər”
“Belarusda yeni seçkilər olmayacaq”. Bu barədə Prezident Aleksandr Lukaşenko“Minsk Təkər Traktor Zavodu”nun (MZKT) işçiləri ilə görüşdə bildirib. O qeyd edib ki, seçkiləri artıq baş tutdu:“Ona görə də siz məndən təzyiq altında nəsə edəcəyimi gözləməyin. Onlar olmayacaq. Çünki nə MZKT, nə MAZ, nə də “BelAZ” olmayacaq. Yarım ilə biz hər şeyi məhv edəcəyik”.
Qeyd edək ki, sözügedən şirkətlər Belarusda keçirilən prezident seçkilərinə etirazlarını bildirərək tətil edirlər.
Belarus hökuməti isə yeni seçilmiş prezident qarşısında istefa verib. Bu barədə qərar A.Lukaşenkonun imzaladığı sərəncama əsasən icra edilib.
Prosesləri “Sherg.az” şərh edən “Tolerantlıq” Sosial Araşdırmalar İctimai Birliyinin sədri, politoloq Azər Rəşidoğlunun fikrincə, hökumətin istefası təbii haldır. Qanunda nəzərdə tutulub ki, yeni prezident and içən andan hökumət istefaya gedir:
“Düşünürəm ki, Lukaşenkonun vəziyyəti ürəkaçan deyil. Heç bir variantda o, sona qədər öz vəzifəsini icra edə bilməyəcək. Onun bir yolu qalır - Rusiyanı yardıma dəvət etmək. Bu halda da, xilas yolu tapa bilməyəcək. Hətta təxribatlara gedib, etirazçıları qanunsuz əməllərə sövq eləsə də, postunda uzun müddət otura bilməyəcək”.
A.Rəşidoğlu vurğulayıb ki, demokratik dünya Belarus seçkilərini tanımadı və ölkə ciddi sanksiyalarla üzləşə bilər:
“Düşünürəm ki, Rusiya və Qərb hakimiyyət dəyişikliyi məsələsində razılığa gəlib. Artıq Lukaşenkonu heç kəs xilas edə bilməz. Sadəcə o, hakimiyyətin ömrünü uzada bilər. Son nəticədə yenə məğlub olacaq.
Nə qədər tez və sakit getsə, özü və ölkəsi üçün bir o qədər yaxşdır”.
