Bloger əlcəzair əsilli, qeyri-fransız olduğu üçün ona qarşı belə ayrıseçkilik edilir
Yaşayış icazəsi ilə Fransanın cənubundakı Monpelyedə yaşayan bloger Boualem Sansalı yanvarın 4-də TikTok kanalında “Fransa ərazisində zorakılıq hərəkətlərinə çağırış” ittihamı ilə həbs edilib. O, deportasiya edilsə də Əlcəzair onu geri göndərib. Qayıdandan sonra o, Seine-et-Marne departamentindəki müvəqqəti saxlama məntəqəsinə yerləşdirilib.
Fransa daxili işlər naziri Bruno Retaillo Əlcəzairin deportasiya edilən əlcəzairli bloggeri qəbul etməkdən imtina etməsinin Fransanı alçaltmaq məqsədi daşıdığını deyib: "Əlcəzair məsələsinə görə biz son dərəcə narahatıq. Bu mövzuda əlimizdə olan bütün vasitələri nəzərdən keçirməliyik". Nazir əlcəzairlilərə verilən vizaların sayının azaldılması və Əlcəzairə maliyyə yardımının kəsilməsinin mümkünlüyü haqqında da danışıb. Hazırda yardımın məbləği 131,79 milyon avro təşkil edir. Bu da ÜDM-i 240 milyard avro olan ölkə üçün çox kiçik məbləğdir.
Media eksperti Azər Həsrət "Sherg.az"a açıqlamasında deyib ki, Fransanın ümumiyyətlə media və ifadə azadlığına münasibəti birmənalı olaraq kəskindir. Ekspert bildirib ki, Fransa rəsmiləri üzdə bir şey desələr də, arxada tamam fərqli işlərlə məşğul olurlar:
"Dünyanın hər tərəfində ifadə azadlığını müdafiə etdiyini iddia edir. Amma özlərinə çatanda jurnalistlərə, blogerlərə, istənilən media fəallarına qarşı ən sərt addımları atmaqdan çəkinmirlər. İndi Fransada yaşayan əlcəzairli blogerlə bağlı proses də o qəbildəndir. Fransa bir növ demək istəyir ki, "əgər bizim ölkədə yaşayırsınızsa, ölkə ilə bağlı tənqidi çıxışlar etməyəcəksiz, fərqli fikir yürütməyəcəksiz. Yəni bu, bir diktatura ovqatıdır. "Demokratiyanın beşiyi" olduğunu iddia edən, dünyaya demokratiya, azadlıq dərsi keçən Fransanın mahiyyəti budur. Blogerə qarşı münasibət də bu yanaşmadan qaynaqlanır. Əslində eyni çıxışları fransız etsəydi, Fransa dövləti ona tamam başqa münasibət sərgiləyərdi. Lakin bloger əlcəzair əsilli, qeyri-fransız olduğu üçün ona qarşı belə ayrıseçkilik edilir. Burada həm ifadə azadlığına dözümsüzlük, həm də milli-etnik kimliyə qarşı ayrıseçkilik var".
