Fransa Prezidenti Emmanuel Makron Rusiya-Ukrayna müharibəsinə dair növbəti açıqlaması ilə çıxış edib. O hesab edir ki, Rusiya münaqişəyə sülh yolu ilə son qoymaq niyyətində deyil, əksinə, danışıqlardan yalnız zaman qazanmaq məqsədilə istifadə edir.
Teleqraf xəbər verir ki, bu barədə Makron "X"dəki paylaşımda qeyd edib:
“Rusiya Ukrayna ilə atəşkəsə və dialoqa getməkdən imtina etməklə, sülh istəmədiyini açıq şəkildə nümayiş etdirir. O, sadəcə müharibəni davam etdirərək, vaxt udmağa çalışır”.
Fransa lideri bu açıqlamanı ABŞ Prezidenti Donald Trampla telefon danışığından sonra səsləndirib.
Qeyd edək ki, bu gün İstanbulda Rusiya və Ukrayna nümayəndə heyətləri arasında keçirilən danışıqlar başa çatıb. Görüş iki saata yaxın davam edib. Rusiya nümayəndə heyətinin rəhbəri Vladimir Medinski danışıqların nəticələrini “qənaətbəxş” adlandırıb.
