Azərbaycan Prezidentinin BMT çıxışı və görüşləri diplomatik uğurlar üçün platformadır
Sentyabrın 23-də Azərbaycan Respublikasının Prezidenti İlham Əliyev və birinci xanım Mehriban Əliyeva BMT Baş Assambleyasının 80-ci sessiyası çərçivəsində keçirilən yüksək səviyyəli müzakirələrdə iştirak etmək üçün BMT-nin mənzil qərargahına gəliblər. Prezident İlham Əliyevin BMT Baş Assambleyasının 80-ci sessiyasında iştirakı və Nyu-Yorka səfəri ölkəmizin beynəlxalq münasibətlər sistemində fəal və prinsipial mövqeyinin göstəricisidir. Səfər çərçivəsində nəzərdə tutulan görüşlər və Prezidentin planlaşdırılan çıxışı, Azərbaycanın qlobal səviyyədə artan nüfuzunun nümayişi baxımından xüsusi əhəmiyyət kəsb edir. Bu çıxış və görüşlərin, beynəlxalq tərəfdaşlarla əməkdaşlığın yeni mərhələyə keçidinə də şərait yaradacağı gözlənilir.
Tədbir Azərbaycanın beynəlxalq təşkilatlarla əməkdaşlığının daha da dərinləşməsi və qlobal çağırışlara münasibətdə mövqeyinin aydın şəkildə ifadə olunması üçün mühüm platformadır. Eyni zamanda Prezident İlham Əliyevin iştirak etdiyi görüşlərdə regional və qlobal gündəmdə olan əsas məsələlərin müzakirəsi də Azərbaycanın beynəlxalq proseslərdə fəal iştirak etdiyini bir daha nümayiş etdirəcək.
Millət vəkili Asim Mollazadə "Sherg.az"a açıqlamasında, bu səfərin Azərbaycanın beynəlxalq nüfuzunu dünyaya çatdırmaq baxımından mühüm əhəmiyyət daşıdığını vurğulayıb:
"Azərbaycan Prezidenti İlham Əliyev BMT-də öz çıxışında, Nyu-York səfəri zamanı keçirilən görüşlərdə Azərbaycanın artan nüfuzunu dünyaya bir daha nümaiş etdirəcək. Ümumiyyətlə Azərbaycan həm ABŞ ilə iqtisadi-siyasi əməkdaşlığı gücləndirir, həm də BMT-də iştirak edən, rəsmi Bakıya dost və tərəfdaş ölkələrlə əlaqələri genişləndirmək şansı qazanır. Bu növbəti dəfə Azərbaycanın diplomatik sahədə uğurları üçün şərait yaradır".
