Orta Dəhlizin artan əhəmiyyəti bəzi ölkələrin əsas kredit göstəricilərinin yaxşılaşmasına səbəb olub.
"APA-Economics" xəbər verir ki, bu barədə "Moody’s" beynəlxalq reytinq agentliyindən bildirilib.
Qeyd edilib ki, dəhlizin üç əsas ölkəsi – Azərbaycan, Qazaxıstan və Gürcüstanda real ÜDM artımının sürətlənməsi iqtisadi perspektivləri möhkəmləndirib, bu da nəqliyyat və logistika sektorlarının inkişafı hesabına baş verib.
“Artan infrastruktur investisiyaları daha yüksək tikinti fəaliyyəti və məşğulluq vasitəsilə geniş iqtisadiyyata da fayda verir. İstehsalat sahəsi lokomotivlər kimi məhsullar, həmçinin avtomobil, əczaçılıq və qida emalı kimi daha yüksək dəyərli sektorlar üçün, daxili bazar və ixrac məqsədilə xarici sərmayə cəlb edib. Dəhlizin yaşıl imicini yaxşılaşdırmaq üçün dəmir yolunun elektrikləşdirilməsi və bərpa olunan enerjinin inteqrasiyası istiqamətində görülən işlər günəş potensialı, Xəzər dənizində külək enerjisi imkanları ilə cəlb olunan sərmayələrin artmasına səbəb olub”, – reytinq agentliyinin son hesabatında qeyd olunur.
Moody’s ekspertləri hesab edirlər ki, bu investisiyalar xüsusən də neft-qaza yüksək dərəcədə bağlı olan Azərbaycanda, müəyyən mənada isə Qazaxıstanda iqtisadiyyatın şaxələnməsinə kömək edir, bununla da onları neft qiymətlərinin dəyişkənliyinə qarşı daha dayanıqlı edir. Son illərdə qeyri-neft real ÜDM artımı sabit olub, hətta karbohidrogen sektorunda hasilatın azalmasını kompensasiya edib.
