"İran hakimiyyəti hər zaman Azərbaycana qarşı müxtəlif ərazi iddiaları ilə çıxış edib".
Bunu "Sherg.az"a açıqlamasında politoloq Sədrəddin Soltan İranın Naxçıvanla bağlı ərazi iddialarına münasibət bildirərkən deyib.
O vurğulayıb ki, Naxçıvanla bağlı ərazi iddiası yeni deyil:
"Hələ müstəqilliyimizin yenicə bərpa edildiyi illərdə, İranın "təbliğat maşını" Qafqazın 17 şəhərinin İran ərazisi olduğunu bəyan edirdi. Onlar bildirirdilər ki, vaxtilə "Qacarların", "Səfəvilərin" dövründə bu ərazilər bir dövlətin tərkibində olub. Rusiya, Azərbaycan müharibəsində, "Gülüstan" və "Türkmənçay" müqavilələrinə əsasən, Arazın şimal hissəsi rusların tərkibinə daxil olub. Həmin dövrdə isə heç İran adlı bir ölkə mövcud deyildi. "Qacarlar" və "Səfəvilər" dövlətinin tarixi ərazilərində isə bir sıra müstəqil dövlətlər yaranıb. Ancaq farslar hakimiyyətə gələndə, bu ərazilərin heç biri İrana aid olmayıb".
Analitikin sözlərinə görə, Naxçıvan bir neçə ölkə ilə sərhəddə yerləşdiyindən, İran tərəfi ona təzyiq etməklə, Azərbaycana öz istəklərini qəbul etdirməyi hədəfləyir:
"Hətta onlar "beşinci kolon"u yaratmaqla Naxçıvanı siyasi, ideoloji cəhətdən Azərbaycandan təcrid etməyi də planlaşdırır. Yəni İran Azərbaycana təzyiq etmək üçün Naxçıvandan istifadə etməyə çalışır. Xatırlayırsınızsa Naxçıvana gedən yüklərin İran tərəfindən qarşısı alınıb, həmçinin Naxçıvanda İran İnqilab doktirinasının idealarının yayılmasına cəhdlər də olub. Bunların hamısı Tehran rejiminin Azərbaycanın ərazi bütövlüyünü qarşı çıxışılarıdır. Heç kəsə sirr deyil ki, vaxtilə müxtəlif ərazilər, hansısa dövlətin tərkibində olub. Amma bu günkü şərtlər və beynəlxalq hüquq həmin ölkələrin ərazi iddialarını məqsədə uyğun hesab etmir. Çünki bu yeni konfliktlərə və regional münasibətlərin gərginləşməsinə səbəb ola bilər. Məsələn vaxtilə Böyük Britaniya "Roma" imperiyasının tərkibində olub. İndi italyanlar İngiltərəyə ərazi iddiası etsinlər? Odur ki, İranın Azərbaycanın əraziləri ilə bağlı iddialar irəli sürməsi gülünc və məntiqsizdir. Cənub qonşumuz bu tip iddialarla özünə qarşı Azərbaycanda inamsızlıq yaradır".
Qeyd edək ki, rejimin Naxçıvanla bağlı ərazi iddiaları getdikcə kəskin hal alıb. Hətta Naxçıvanda İran kəşfiyyatının fəallaşması ilə bağlı iddialar dolaşır.
