Ruben Vardanyanı, digər separatçıları heç bir müraciət, qətnamə xilas edə bilməz
Fransanın Erməni Təşkilatları Şurası (CCAF) nahar ziyafəti təşkil edib. Ziyafətə Fransa hökumətinin üzvləri, siyasi partiya rəhbərləri, parlamentarilər, diplomatlar, jurnalistlər, aktyorlar və incəsənət xadimləri qatılıblar. Fransız-erməni dostluğunun şərəfinə çoxsaylı badələrin qaldırıldığı bu ziyafətdə Fransa hökuməti adından ölkənin daxili işlər naziri Bruno Retayo çıxış edib. "Erməni məsələsi"nin Fransa üçün əhəmiyyətini vurğulayan fransız nazir qeyd edib ki, illik nahar ziyafəti sadəcə yemək-içmək məclisi deyil, böyük “dostluq və sədaqət görüşüdür”. O, özünün dünya erməniçiliyinə və erməni məsələsinə sədaqətini də xüsusi vurğulayaraq bildirib ki, bu sədaqət həm də cismani yaxınlığa əsaslanır, çünki "Ermənistan Fransanın bacısıdır". Daha sonra Bruno Retayo məşhur ermənipərəst fransız yazıçısı Anatol Fransdan misal gətirərək deyib ki, "beynəlxalq ictimaiyyət Ermənistanın müdafiəsində çox vaxt kifayət qədər cəsarət göstərmir. Ancaq Fransa özünəməxsus tərzdə həmişə Ermənistanın yanında olub”. Absurd fikirlərini davam etdirən fransız nazir çıxışının sonunda hazırda Bakıda mühakimə olunan erməni separatçı və terrorçularının azad edilməsi məsələsinə toxunaraq sentimental fikirlər səsləndirib, daim onların haqqında düşündüyünü deyib: “Bu gün mənim fikrim inandıqları "dəyərlər" uğrunda öz sağlamlıqlarını və həyatlarını riskə atan həmin 23 nəfərlədir. Mən onların haqqında düşünürəm və ümid edirəm ki, bugünkü sözlərim Azərbaycanın sərhədlərinə çatacaq və məhbuslar azad olunacaq”.
Siyasi şərhçi Bəybala Mirzəyev "Sherg.az"a deyib ki, B.Retayo öz sələflərindən fərqli olaraq Azərbaycana müraciətində ultimativ tondan istifadə etməyib, sadəcə, ümid etdiyini dilə gətirib. Çünki təcrübəli siyasətçi olan Retayo Bakı ilə sərt ritorika ilə danışmağın səmərəsiz olduğunu anlayır:
"Odur ki, B.Retayo Fransanın neokolonialist siyasətini dünyada ifşa edən Azərbaycana müraciətində mümkün qədər ehtiyatlı ifadələrdən istifadə etməyə çalışıb. Bu, əlbəttə ki, Fransa siyasəti üçün əsl yenilikdir. Görünür, Cənubi Qafqazın aparıcı ölkəsi olan Azərbaycanla ermənilərə görə münasibətlərin korlanmasının Fransaya vurduğu zərər artıq rəsmi Parisi düşünməyə və ritorikasını yumşaltmağa məcbur edir. Əslində, Parisdə də yaxşı başa düşürlər ki, Ruben Vardanyanı, digər separatçıları heç bir müraciət, qətnamə-filan xilas edə bilməz. Çünki heç bir ölkə separatçıları, terrorçuları bağışlamır. Heç kim separatçıların nazı ilə oynamır. İrəvanın, Parisin həmin 23 ermənini "əsir və girov adlandırması" onlara qarşı münasibəti dəyişə bilməz. Milli-etnik zəmində qan tökmüş, soyqırımı və terror aktları törətmiş, terrorçuluğu maliyyələşdirmiş şəxslərin "əsir və girov" adlandırılması qəbuledilməzdir və mənəviyyatsızlıqdır".
Analitikə görə, Retayo separatçıları "əsir və girov" adlandırıb, onların azad edilməsi üçün Azərbaycana müraciət etməyin siyasi riyakarlıq olduğunu düşünməliydi:
"Çünki cənab Retayo ölkəsinin daxili asayişi üçün məsuliyyət daşıyan yüksək çinli məmurdur. O, təcrübəli bir siyasətçi kimi bilməlidir ki, onun bu addımı presedent yaradır. Sabah Azərbaycan tərəfi də Fransaya müraciət edib "Dənizaşırı" ərazilərdə müstəqillik şüarları ilə çıxış etdiklərinə görə fransız hökuməti tərəfindən həbs edilən şəxslərin azadlığa buraxılmasını tələb edə bilər. Həmçinin, korsikalıların, bretonların haqlarını da müdafiə edə bilərik. Makron Fransası ruben vardanyanlar, araik arutyunyanlar, arkadi qukasyanlar üçün risklərə getməməlidir. Fransa rəsmiləri və ictimai xadimləri Vardanyan və onun məsləkdaşlarını müdafiə etməklə faktiki olaraq məsuliyyəti bölüşürlər. Söhbət təkcə mənəvi yox, həm də hüquqi məsuliyyətdən gedir".
