ABŞ-ın qarant rolunda iştirakı sülh sazişini sürətləndirə bilər
Sülhün şərtlərinin müəllifi Azərbaycan tərəfidir
Azərbaycan Prezidenti İlham Əliyev ABŞ Prezidenti Donald Trampa təşəkkür edib.
Dövlət başçısı bu barədə X-də yazıb.
"Prezident Donald Tramp, təşəkkür edirəm, "Truth Social" hesabınızda paylaşdığınız xoş sözlərinizə görə minnətdaram. Azərbaycan və Ermənistan arasında sülh prosesinin irəlilədilməsində və tarixi Vaşinqton sammitinə ev sahibliyi etməyinizdə oynadığınız mühüm rolu yüksək qiymətləndirirəm",- İ.Əliyev qeyd edib.
Dövlət başçısı vurğulayıb ki, Donald Tramp Azərbaycan ilə Amerika Birləşmiş Ştatları arasında əbədi dostluğun və formalaşmaqda olan strateji tərəfdaşlığın memarıdır:
"Dostluğumuzu yüksək dəyərləndirirəm".
Qeyd edək ki, ABŞ Prezidenti Donald Tramp özünün “Truth” sosial şəbəkəsində Azərbaycanla bağlı növbəti paylaşım edib.
Ağ Ev rəhbəri Azərbaycan Prezidenti İlham Əliyev və Ermənistan Baş naziri Nikol Paşinyanla birgə fotosunu paylaşıb.
“Azərbaycan və Ermənistan arasında müharibənin həllinə kömək etmək, eyni zamanda bu iki böyük lider Prezident İlham Əliyev və Baş nazir Nikol Paşinyanla dost olmaq şərəfdir. Bu mənim üçün, amma daha da önəmlisi Amerika Birləşmiş Ştatları üçün əbədi dostluq olacaq”, - deyə Tramp yazıb.
Milli Məclisin deputatı Bəhruz Məhərrəmov Sherg.az-a deyib ki, ABŞ Prezidenti Donald Trampın Azərbaycan Prezidentinin hərbi-siyasi yolla yaratdığı yeni geosiyasi reallığın əks olunduğu növbəti paylaşımı Bakı və İrəvan arasında sülh müqaviləsinin imzalanması üzrə proseslərin tezləşdirilməsi istiqamətində mühüm əhəmiyyətə malik addım hesab edilməlidir:
"Azərbaycan və Ermənistan liderləri ilə görüşün fotosunu paylaşmaqla ABŞ Vaşinqtonda imzalanan sənədlərin və bununla da sülh istiqamətində atılan addımların davamlılığında maraqlı olduğunu göstərir. Bu özlüyündə çox mühüm amildir. Çünki Ermənistan bir qayda olaraq Azərbaycanla sülh istiqamətində əldə edilən razılıqlar üzrə üzərinə götürdüyü öhdəlikləri yerinə yetirməməklə və yaxud hər hansı formada prosesləri ləngitməklə vaxt qazanmağa üstünlük verib. Lakin Vaşinqtonun qarantorluğu və ABŞ Prezidentinin öz paylaşımları ilə məsələni diqqətdə saxladığını göstərməsi Ermənistan üzərində pozitiv təsir mühiti formalaşdırmaqla İrəvanı sülh sazişinin imzalanması qarşısında maneə kimi rol oynayan əngəlləri aradan qaldırmağa sövq edə bilər. Bu, eyni zamanda Azərbaycanın mühüm siyasi qələbəsi hesab olunmalıdır. Çünki ABŞ-nin reallaşmasını arzuladığı sülhün, o cümlədən Bakı və İrəvan arasında paraflanan sazişin şərtlərinin müəllifi Azərbaycan tərəfidir".
