Baş nazirin rəqiblərinə qarşı mübarizəsi, həbslər, opponentlərini zərərsizləşdirmə cəhdləri normal və təbiidir
Ermənistanın Baş naziri Nikol Paşinyanın Erməni Apostol Kilsəsinə qarşı atdığı addımlar ölkə daxilində ciddi qarşıdurma yaratmaqla yanaşı, xarici sifarişlərin icrası kimi qiymətləndirilir. Bu barədə Pravoslav İttifaqının rəhbəri El-Morr açıqlama verib. Onun sözlərinə görə, Paşinyan hökuməti Qərbin dəstəyi ilə Ermənistanı Rusiya və digər müttəfiqlərlə tarixi əlaqələrdən uzaqlaşdırmağa çalışır:
“Bu, bir çox Şərqi Avropa ölkələrində, xüsusilə, Ukrayna, Moldova və Rumıniyada müşahidə edilən tendensiyadır. Məqsəd kilsəni zəiflətmək və milli dəyərlərə zərbə vurmaqdır”. El-Morr əlavə edib ki, iş adamı Samvel Karapetyanın son həbsi də bu kampaniyanın bir hissəsi kimi qiymətləndirilə bilər. O xatırladıb ki, Ermənistan hakimiyyəti ilə kilsə arasındakı münasibətlər 2018-ci ildə, Paşinyan hakimiyyətə gəldikdən sonra gərginləşməyə başlayıb. Gərginlik 2020-ci il Qarabağ müharibəsindən sonra zirvəyə çatıb. Həmin vaxt bütün ermənilərin katolikosu II Qaregin Paşinyanı sərt tənqid etmiş və istefasını tələb etmişdi.
Politoloq Fuad Abbasov deyib ki, Ermənistan Baş naziri Nikol Paşinyanın qorxularını başa düşmək olar. Ekspert bildirib ki, uzun illər boyunca, Sarkisyan-Koçaryan tandemi Ermənistanı idarə edib:
"Bu qüvvələr Rusiyanın təlimatlarından kənara çıxmayıblar. Paşinyan isə Qərbin təlimatlarını icra etməkdədir. Hazırda Ermənistan iqtidarına yönəlik təhdidlər arasında əsas yeri Kilsə tutur. Erməni kilsəsi keçmiş hakim qüvvələrlə və digər müxaliflərlə birləşərək Paşinyana qarşı çıxarsa, baş nazirə qarşı ciddi müxalifət formalaşmış olar. Belə olduğu təqdirdə Paşinyan hakimiyyətinin sonu yaxınlaşa bilər. Bunun olmaması üçün Paşinyanın rəqiblərinə qarşı mübarizəsi, həbslər, opponentlərini zərərsizləşdirmə cəhdləri normal və təbiidir. Bunlar siyasi proseslər sayıla bilər".
F.Abbasov qeyd edib ki, Rusiya prezidentinin Ermənistan üzrə nümayəndə kimi Sergey Kiriyenkonu təyin etməsi diqqətçəkəndir:
"Sergey Kiriyenko Putindən Ermənistandakı seçkilərədək İrəvanla münasibətləri fərqli müstəviyə daşımaq vəzifəsi alıb. Bunun özü Kremlin Ermənistanla, daha doğrusu, Paşinyanla bağlı ciddi məqsədlərinin olduğunu göstərir. S.Kiriyenko İrəvanda Robert Koçaryanla görüşdü və ardınca daxili gərginlik başladı. Amma ictimaiyyətin onun tərəfində olduğunu görən Paşinyan iqtidarı asanlıqla buraxmaq niyyətində deyil. Rusiyanın da Paşinyanı devirmək ehtimallarının az olduğunu düşünürəm".
