“Baş nazirə qarşı daxildə formalaşan bu cəbhənin məqsədi onu hakimiyyətdən göndərməkdir”
“Ermənistanda daxili siyasi vəziyyət mürəkkəbləşməyə doğru gedir”.
Bu sözləri “Sherg.az”a Cənubi Qafqaz Sülh və Münaqişə İnstitutunun rəhbəri Məhəmməd Əsədullazadə deyib.
Politoloq bildirib ki, Çiçəklənən Ermənistan Partiyasının sədri Çarukyanın tərəfdarlarının etirazı və onun ofisində yoxlamalar keçirilməsi ciddi mətləblərdən xəbər verir:
“Bu, Paşinyana qarşı qurulan çevriliş planın bir hissəsidir. Məhz Paşinyanın baş qərargah, Milli Təhlükəsizlik və polis rəhbərlərinin işdən uzaqlaşdırılması, eks-prezident L.T.Petrosyanla təcili görüş, sabiq DTK sədri Artur Vanetsyanın Paşinyan əleyhinə ardıcıl olaraq tənqidləri gedişatın əsas hissəsidir. Hazırda Artur Vanetsyan Rusiyadan birbaşa idarə olunur. Hazırda Paşinaya qarşı ciddi rəqib və Rusiya tərəfindən “stavka” edilən fiqur Artur Vanetsyandır. Məhz güc rəhbərlərinin istefaya göndərilməsi, onların Vanetsyanla əlaqələri və çevrilişin hazırlanması mümkündür. Nikol Paşinyan cəld təpənərək, bu siyasi planın qarşısını müvəqqəti almış oldu”.
Siyasi şərhçinin sözlərinə görə, göründüyü kimi Ermənistanda Paşinyana qarşı ciddi siyasi mübarizə formalaşır:
“Paşinyanın Qarabağ məsələsində hər hansı kompromisə gedəcəyi mümkün görünmür. Baş nazirə qarşı daxildə formalaşan bu cəbhənin məqsədi onu hakimiyyətdən göndərməkdir. Paşinyan prosesləri ələ ala bilməzsə, onun siyasi hakimiyyətinin sonu gələ bilər. Əgər baş nazir rəqiblərinə qalib gələrək Qərblə əməkdaşlığı davam etdirə bilərsə, o cümlədən daxili qrupları tam məğlub edərsə, danışıqlarda müəyyən güzəştə gedə bilər. Amma indiki məqamda Ermənistanda siyasi situasiya gərgindir. Daxili siyasi münaqişə qızışır. Bu da Azərbaycana imkan verir ki, öz ərazilərini işğaldan hərbi yolla azad etsin”.
