“Fələstin davası” gərginlik yaratsa da, əsas məsələ Türkiyənin İsrail ətrafında nüfuz dairəsinin genişlənməsidir
Türkiyə və İsrail rəsmiləri Suriyada arzuolunmaz insidentlərin qarşısının alınması üçün gərginliyin azaldılması mexanizminin yaradılması ilə bağlı dünən Azərbaycanda texniki görüş keçirdi. Yüksək çinli israilli məmur “Tayms of İsrail” nəşrinə açıqlamasında deyib ki, görüş zamanı İsrail Suriyada xarici qoşunların yerləşdirilməsi ilə bağlı hər hansı dəyişikliyin, xüsusən də Palmira ərazisində Türkiyə bazalarının yaradılmasının qırmızı xətt olduğunu açıqlayıb: “İsrail açıq şəkildə bildirdi ki, hər hansı bu cür fəaliyyətin qarşısını almaq Dəməşq hökumətinin üzərinə düşür. İsraili təhdid edən istənilən fəaliyyət Suriya Prezidenti Əhməd əş-Şaranın hakimiyyətini təhdid edəcək”.
İsrail Baş nazirinin Ofisi məlumat yayıb ki, Türkiyə ilə Suriya üzrə danışıqlar sabitliyi qorumaq məqsədi daşıyır: "Dünən gecə İsrailin milli təhlükəsizlik müşaviri Tzachi Haneqbinin rəhbərlik etdiyi nümayəndə heyəti Azərbaycanda türkiyəli həmkarları ilə görüşüb. İsrail nümayəndə heyətinə Müdafiə Nazirliyi və təhlükəsizlik agentliyinin yüksək rütbəli rəsmiləri daxil olub". Netanyahunun ofisi danışıqlara ev sahibliyi etdiyi üçün Azərbaycana təşəkkür edib: "İsrail mühüm danışıqlara ev sahibliyi etdiyinə görə Azərbaycana və Prezident İlham Əliyevə təşəkkür edir". Bildirilib ki, görüşdə hər bir tərəf regionda öz maraqlarını təqdim edib, regional sabitliyi qorumaq üçün dialoq yolunda davam etmək razılaşdırılıb: "Danışıqlarda tərəflər regionda öz maraqlarını təqdim etdi və onlar sabitliyi qorumaq üçün kommunikasiya kanalını açıq saxlamağa razılaşdılar".
Vəhdət Partiyasının sədr müavini Vasif Əfəndiyev "Sherg.az"a açıqlamasında deyib ki, Türkiyədə AKP hakimiyyətə gəldikdən sonra İsraillə münasibətlərdə qismən soyuqluq yaransa da, indiyə qədər münasibətlərin korlanması kritik həddə çatmayıb. Ekspert vurğulayıb ki, sözdə gərginlik “Fələstin davası” kimi olsa da, əsas məsələ Türkiyənin İsrail ətrafında nüfuz dairəsinin genişlənməsidir:
"Əslində bu məsələdə ən çox narahat olan tərəf məhz ABŞ idi. Ancaq bu istiqamətdə müəyyən yumşalmanın olduğunu görürük. İsrail baş naziri B.Netenyahunun ABŞ-yə səfəri zamanın prezident Donal Tramp açıq mətnlə Türkiyənin Suriyada mövqelərinin güclənməsinə isti yanaşdığını bildirdi. Netanyahuya Türkiyə ilə münasibətlərdə daha səmimi olmaq məsləhəti verdi. ABŞ prezidentinin cənab İlham Əliyevə ünvanlandığı etimad məktubu və İsraillə münasibətlərimizin yüksək səviyyədə olmasını vurğulaması da gələcəkdə Türkiyə -İsrail əlaqələrinə müsbət təsir göstərəcək. Fələstində hərbi əməliyyatların alovlanmasına qədər Azərbaycan Türkiyə ilə İsrail arasında münasibətlərin normallaşmasında xüsusi rol oynamışdı. Azərbaycanın barışdırıcı, ortaq dostluq nümunəsi siyasəti bundan sonra da davam edəcək. Ümid edirik, bizə dost-qardaş olan iki ölkənin münasibətləri yenidən öz məcrasına qayıdacaq".
