“İrəvana isə öz ordusunun işlənmiş silahlarını göndərir”
“Azərbaycan yeni qırıcılar əldə etməklə ilk növbədə Ermənistan qarşısında havada öz üstünlüyünü qoruyacaq”
“Azərbaycanla Rusiya arasında hərbi-texniki əməkdaşlıq çərçivəsində bu ölkədən 5 milyad dollardan artıq hərbi texnika alınıb”.
Bunu “Sherg.az”a açıqlamasında Cənubi Qafqaz Sülh və Münaqişə İnstitunun rəhbəri Məhəmməd Əsədullazadə deyib.
Siyasi şərhçi bildirib ki, Rusiya dünya silah bazarında öz yerini qorumaq və yeni silahlarını satmaq üçün bazarlar axtarmaqdadır:
“Moskva yeni müqavilələr bağlamaqla ölkəmizə yeni silahların satışını reallaşdırmağa çalışır. Məsələnin maraqlı tərəfi ondadır ki, Azərbaycana bu təklifi Rusiya özü edir. Rusiya əvvəllər Azərbaycana müasir raket və aviasiyanın satışında tərəddüd edirdi. Azərbayacanın alternativ silah bazarı əldə etməsi və kifayət qədər maliyyə imklanlarının olması Kremlin fikrini dəyişdirdi. Rəsmi Bakının digər ölkələrdən qırıcı təyyarələr alınması istiqamətində işlərə başlamasından sonra Rusiya Azərbaycana “SU-35” və “MİQ-35” qırıcılarını satışını təklif etdi. Rusiyanın yeni nəsil “SU-35” qırıcısı, ABŞ-ın yeni “F-35” qırıcısının analoqudur”.
Siyasi şərhçiyə görə, Rusiya “SU-35” təyyarələrini Ermənistana ixrac edəcəyini dəfələrlə bəyan etsə də, Moskva döyüş təyyarələrini İrəvana göndərməyib:
“Hətta erməni baş nazir Nikol Paşinyan İrəvan yaxınlığında Rusiyanın hərbi bazasına gedərək, Rusiyanın “SU-35” təyyarəsinə əyləşərək oradan Azərbaycana “mesaj” verdi. Amma, Rusiya bu silahları geniş partiyada Azərbaycana satmağı reallaşdırır. Pandemiya və neft qiymətlərində ucuzlaşma dövründə Moskvanın döyüş təyyarələrini Ermənistana verəcəyi mümkün görünmür. Təyyarələri ucuz qiymətə və yaxud kreditlə Ermənistana verməkdənsə, digər ölkələrə baha qiymətə sata bilər. Rusiya sadəcə İrəvana bir-iki təyyarə verməklə forpostunu sakitləşdirməyə çalışır”.
Analitik vurğulayıb ki, Azərbaycanın silah arsenalındakı “MİQ-29” və “SU-30” hərbi aviasiyası döyüş tələblərinə cavab versə də, aviasiya parkının yenilənməsi mütləqdir:
“Azərbaycan ABŞ-dan hərbi helikopterlər, İtaliyadan hərbi təlim məqsədləri üçün qırıcılar alır. Pakistandan da yeni qırıcılar alınması istiqamətində razılıq əldə edilib. Hər halda Rusiyanın ölkəmizə satacağı hərbi təyyarələr Ermənistana siyasi şapalaqdır. Azərbaycan yeni qırıcılar əldə etməklə ilk növbədə Ermənistan qarşısında havada öz üstünlüyünü qoruyacaq. Regionda ən güclü hərbi aviaparka sahib olacaq. Ermənistan başa düşməlidir ki, onun müttəfiqi Rusiya ən güclü qırıcısını Azərbaycana satır. Moskva əvvəlki illərdən fərqli olaraq Azərbaycana satdığı bahalı və müasir silahları Ermənistana vermir. Onun əvəzində öz ordusunun işlənmiş silahlarını göndərir. Əlbəttə, Azərbaycan bu silahları ambarda saxlamaq və təlimdə istifadə etmək üçün almır. Yeni geosiyasi mənzərə formalaşır və mütləq şəkildə silahlanma öz ərazilərimizin azad olunmasına yönələcək. Azərbaycan Rusiyadan alacağı “SU-35” qırıcılarının ilk sınağını Ermənistanın işğal olunmuş ərazilərində hərbi obyektlərini vurmaqla sınaqdan keçirməlidir”.
