Natiq Miri: Üfiqdə Türkiyə, Suriya, Azərbaycan olmaqla yeni üçlük formatı yaradılır
14 aprel 2025-ci il tarixində Azərbaycan Respublikasının xarici işlər naziri Ceyhun Bayramov ilə Suriyanın keçid hökumətinin xarici işlər və xaricdə yaşayan suriyalılar naziri Əssad Həsən Əş-Şibani arasında telefon danışığı aparılıb.
Bu barədə XİN-dən məlumat verilib.
Telefon danışığı zamanı Azərbaycan-Suriya əlaqələri, regional təhlükəsizlik vəziyyəti müzakirə olunub.
Nazirlər telefon danışığı zamanı Suriyada Əsəd rejiminin dağılmasından sonra Azərbaycanla-Suriya arasında geniş əməkdaşlıq perspektivlərinin mövcud olduğunu bildiriblər.
Uzun fasilədən sonra ölkəmizin Suriyada səfirliyinin işinin bərpasına göstərilən dəstəyə görə təşəkkür ifadə olunub. Suriyada sabitliyin möhkəmləndirilməsi istiqamətində səylərə toxunarkən, ölkəmizin Suriyanın bərpa prosesində iştirak niyyətinin, habelə Suriyaya göstərilən humanitar yardımın əhəmiyyəti vurğulanıb. Bu çərçivədə, Azərbaycan-Türkiyə-Suriya əməkdaşlıq formatının inkişaf etdirilməsinin vacibliyi qeyd olunub.
Nazirlər həmçinin qarşılıqlı maraq doğuran ikitərəfli və çoxtərəfli məsələlər ətrafında fikir mübadiləsi aparıblar.
Politoloq Natiq Miri “Sherg.az”a bildirib ki, Suriya Yaxın Şərqin qapısı sayılır:
“Ona görə regionda güclü olmaq, Suriya ilə dostluq münasibətlərini zirvəyə daşımaq prioritet olmalıdır. Məlum olduğu kimi üfiqdə Türkiyə, Suriya, Azərbaycan olmaqla yeni üçlük formatı yaradılır. Həmin üçlük formatı hansısa dövlətə qarşı çevrilməyib. Azərbaycanın bu formatda yer alması müəyyən mənada regionda narahat olan qüvvələrin sakitləşməsinə yol açır. İsrailin Suriyada mövcud olan Türkiyə ilə toqquşma qorxusu ilə bağlı narahatlığı var. Azərbaycanın Suriyada varlığı və sözügedən üçlük formatının mövcudluğu İsrail dövlətinə müəyyən təminatdır ki, onlar İsrailə qarşı yönəlməyib. Bu baxımdan Suriya ilə münasibətlərin tənzimlənməsi qardaş Türkiyənin mövqeylərini gücləndirdiyi kimi Azərbaycanın da geosiyasi əhəmiyyətini artırır. Azərbaycanın Suriyanın dirçəlməsi üçün bir çox faydalı sahələri var. Buraya enerji daşıyıcıları, neft-qaz mənbələri, yaşıl enerjinin əldə olunmasıyla bağlı Azərbaycanın Suriyaya verə biləcəyi yardım və töhfələr mövcuddur. Suriya tərəfindən türk dövlətləriylə münasibətlərin onlara təhlükəsizliyinə təminat verəcək amil kimi dəyərləndirilməsi müsbət hadisədir. Bu münasibətləri təkcə sözdə deyil, eyni zamanda əməli fəaliyyətdə həyata keçirmək lazımdır. Ona görə də münasibətləri tənzimləmək və qarşılıqlı səfərləri intensivləşdirmək vacibdir”.
