Azər Həsrət: TDT-yə üzv ölkələr daha şaxəli və geniş fəaliyyətə keçməlidirlər
Türk Dövlətləri Təşkilatının (TDT) hökumət başçılarının və onların müavinlərinin ilk toplantısı keçiriləcək.
Toplantı 18 sentyabr tarixində Qırğızıstanın paytaxtı Bişkek şəhərində keçiriləcək.
TDT-nin bu kimi görüşləri üzv ölkələr arasında həm siyasi, həm də iqtisadi inteqrasiyanın dərinləşməsi baxımından mühüm əhəmiyyət kəsb edir. Hökumət başçılarının bir araya gəlməsi qəbul edilən qərarların operativ icrasını təmin etməklə yanaşı, praktiki əməkdaşlıq mexanizmlərinin qurulmasına şərait yaradır. Eyni zamanda belə görüşlər Türk dövlətlərinin ortaq maraqlarını müdafiə etmək, beynəlxalq təşkilatlar çərçivəsində koordinasiyanı gücləndirmək və qlobal miqyasda təşkilatın nüfuzunu artırmaq üçün yeni imkanlar açır. Bu, həm də Türk dünyasının vahid mövqeyini nümayiş etdirmək, mədəni-humanitar inteqrasiyanı dərinləşdirmək və gələcək nəsillər üçün strateji tərəfdaşlığın möhkəm əsaslarını formalaşdırmaq baxımından əhəmiyyətlidir.
Siyasi şərhçi Azər Həsrət Sherg.az-a bildirib ki, TDT-nin müxtəlif istiqamətlər üzrə tədbirlərinin artırılması vacibdir:
"Çünki inteqrasiya prosesi artıq kifayət qədər yubadılıb. Əslində, 30 ildən çoxdur ki, biz bir araya gəlmişik, ilkin təməllər atılıb. 2009-cu il oktyabrın 3-də Naxçıvanda, Prezident İlham Əliyevin rəhbərliyi ilə Türkdilli Dövlətlərin Əməkdaşlıq Şurası – Türk Konseyi yaradıldı. Sonrakı mərhələdə isə onun adı dəyişdirilərək Türk Dövlətləri Təşkilatı oldu. Lakin bütün bunlar qurumun tam gücü ilə fəaliyyət göstərdiyini deməyə əsas vermir. Azərbaycan daha intensiv əməkdaşlıq üçün meydança təqdim edir və həm Türkiyə, həm də ölkəmiz geniş fəallıq göstərir. Son vaxtlar digər türk dövlətlərinin də aktivləşməsi müşahidə olunur, amma bu, hələ də kifayət deyil.
TDT-yə üzv ölkələr daha şaxəli və geniş fəaliyyətə keçməlidirlər. Hökumət başçılarının, nazirlərin, müxtəlif sahələri təmsil edən şəxslərin toplantıları təşkil olunur. Lakin bunlar daha sistemli və davamlı xarakter almalıdır. Məsələn, uzun illərdir təklif edilir ki, niyə təşkilat çərçivəsində ortaq futbol yarışı keçirilməsin? Hər ölkənin çempionlarının və ya ilk üçlüyündə olan komandalarının iştirak edəcəyi belə bir çempionat mütəmadi şəkildə təşkil oluna bilər. İdman sahəsində inteqrasiya, xüsusilə futbolda, çox səmərəli və faydalı olar. Çünki futbola maraq böyükdür, digər idman növlərində də eyni təşəbbüslər həyata keçirilə bilər. Bu cür layihələr ölkələri daha tez yaxınlaşdırar".
Analitikin fikrincə, TDT daxilində inteqrasiya nə qədər sıx olsa, bir o qədər faydalıdır:
"Çox vaxt hansısa türk dövlətində müəyyən proseslər baş verir, amma digər ölkələr, yaxud da təşkilatın özü susur. Halbuki biz məhz ortaq mənafelərimizi müdafiə və təmsil etmək üçün birləşmişik. Lakin bəzən susqunluq nümayiş etdiririk. Bu isə istənilən səmərəliliyi ortaya qoymur".
