“Söhbət milyardlardan gedəcək, Çin üçün bu, ağır zərbəyə çevriləcək”
ABŞ-nin yeni seçilmiş Prezidenti Donald Tramp Çinə cərimə ödətdirməyə çalışır. Ağ Ev administrasiyasının Kanada, Çin və Meksikaya qarşı ticarət tarifləri tətbiqinin səbəbləri izah edilən sənəddə belə deyilir: “2020-ci ildə COVID-19 pandemiyası Uhandakı biolaboratoriyadan sızma ilə başladı və Amerika iqtisadiyyatına 14 trilyon dollara başa gəldi. On milyonlarla insanın ölümünə səbəb olan və ABŞ iqtisadiyyatına azı 14 trilyon dollara başa gələn COVID-19 pandemiyası Çin Kommunist Partiyasının inkar etməyə davam etdiyi Çinin Uhan şəhərindəki laboratoriyada yaranıb". Koronavirusun Çindən dünyaya yayıldığı məlum həqiqətdir. Bu pandemiyadan bütün dünya zərər gördü. Amma D.Trampın köhnə palan içi tökməkdə məqsədi qazanc əldə etməkdir. Görünür, D.Tramp hesabı Çinə kəsməyə çalışır. Ticarətçi Tramp ölkə iqtisadiyyatına haradan külli miqdarda yatırım gətirə biləcəyini ölçüb-biçir və ilk olaraq da Çini hədəf alıb.
İqtisadçı Natiq Cəfərli “Sherg.az”a açıqlamasında qeyd etdi ki, koronavirus başlayandan bəri bu barədə ciddi iddialar var idi. Çox güman ki, Tramp administrasiyası bunu araşdırmağa başlayacaq:
- Əgər iddialar təsdiqini taparsa, Çin üçün ciddi problemlər yarada bilər. Məhkəmə qərarları olarsa, ölkələr və şəxslərin kompensasiya tələbetmə hüququ yaranacaq. Və bu zaman söhbət milyardlardan gedəcək. Çin üçün bu, ağır zərbəyə çevriləcək. Təbii ki, Tramp administrasiyası bu məsələdən təzyiq mexanizmi kimi istifadə etməyi düşünür. Yəni bu, təzyiq göstərmək üçün irəli sürülmüş, amma həqiqət payı kfayət qədər yüksək olan iddiadır.
