Fevralın 14-16-da Almaniyada keçiriləcək 61-ci Münhen Təhlükəsizlik Konfransında (MTK) 60-dan çox dövlət və hökumət başçısı iştirak edəcək.
Azərbaycan və Ermənistan liderləri konfransda iştirak edəcəklərini rəsmən açıqlamasalar da, bəzi məlumatlara görə, həm İlham Əliyev, həm də Nikol Paşinyan Münhendə olacaq.
Azərbaycan Xarici İşlər Nazirliyinin mətbuat katibi Ayxan Hacızadə "Sherg.az"a açıqlamasında İlham Əliyevin sözügedən konfransda iştirakı ilə bağlı məlumatın olmadığını bildirib:
"Hər hansı bir səfər və ya görüş olarsa müvafiq olaraq məlumat verəcəyik. İndiki məqamda bu istiqamətdə hər hansı bir açıqlama yoxdur".
Qeyd edək ki, ötən il, 2024-cü ilin fevralında da hər iki lider Almaniya kansleri Olaf Şoltsun təşəbbüsü ilə Münhendə görüşüblər. Bu, artıq Brüssel danışıqlar formatının iflasa uğradığı və Qərbin danışıqlar platformasını bərpa etməyə çalışdığı mərhələ idi.
