Ekspertin fikrincə, sertifikatlaşdırma prosesi müəllimlərin peşəkar inkişafı üçün vacibdir
Təhsilverənlərin sertifikatlaşdırılması prosesi Azərbaycanda təhsil sistemində keyfiyyətin yüksəldilməsi məqsədilə həyata keçirilən vacib addımlardan biridir. Bu proses müəllimlərin peşəkar bacarıqlarının artırılması, tədris keyfiyyətinin yaxşılaşdırılması və ümumilikdə təhsil sistemində şəffaflığın təmin edilməsinə yönəlib.
Təhsilverənlərin sertifikatlaşdırılması prosesinin nəticələrini təhlil edən təhsil eksperti Kamran Əsədov “Sherg.az”a açıqlamasında deyib ki, sertifikatlaşdırma müəllimlərin peşəkarlığının yüksəlməsinə xidmət edir:
“Sertifikatlaşdırma prosesi vasitəsilə müəllimlərin bilik və bacarıqları daha obyektiv qiymətləndirilir. Bu, onların tədris keyfiyyətinin artırılmasına təkan verir. Sertifikat alan müəllimlər daha yüksək əmək haqqı almağa və peşəkar səviyyədə inkişaf etməyə stimul əldə edir. Bu, təhsilverənlərin daha çox öz üzərində işləməsinə, innovativ tədris metodlarını tətbiq etməsinə gətirib çıxarır. Sertifikatlaşdırma ilə yüksək səviyyədə fəaliyyət göstərən müəllimlər təşviq edilir, nəticədə məktəblərdə tədrisin keyfiyyəti artır və tələbələr daha yaxşı təhsil alır.
Bu proses müəllimlərin kompetensiyaları əsasında yerləşdirilməsini təmin edir. Bu da daha güclü və zəif müəllimlərin müəyyən edilməsi və təlimlərə yönləndirilməsinə səbəb olur”.
Bununla belə, K.Əsədov sertifikatlaşdırmanın mənfi tərəflərinin də olduğunu qeyd edib. Onun sözlərinə görə, imtahan prosesi bəzi müəllimlər üçün ciddi psixoloji təzyiq yaradır. Xüsusilə yaşlı müəllimlər üçün bu proses stresli ola bilər, nəticədə onların iş keyfiyyəti azala bilər:
“Sertifikatlaşdırma prosesinin qiymətləndirmə meyarları və obyektivliyi barədə müəyyən narahatlıqlar mövcuddur. Bəzi müəllimlər öz bilik və bacarıqlarının tam olaraq əks olunmadığını bildirir.
Regionlar üzrə qeyri-bərabərlik var. Böyük şəhərlərdə və paytaxtda çalışan müəllimlər sertifikatlaşdırma prosesinə daha yaxşı hazırlaşa bilsələr də, kənd rayonlarında resurs çatışmazlığı olan müəllimlər üçün bu, daha çətin keçə bilər.
Onu da deyim ki, sertifikatlaşdırma prosesində iştirak edən müəllimlərin nəticələri bu prosesin gələcək təhsil keyfiyyətinə təsirini ölçmək üçün əsas göstəricilərdən biridir. Məsələn, sertifikatlaşdırılmış müəllimlərin iş keyfiyyətində artım müşahidə olunarsa, tədris olunan fənlər üzrə nailiyyətlərdə də inkişaf gözlənilir. Həmçinin sertifikatlaşdırma prosesindən uğurla keçməyən müəllimlərin peşə inkişaf proqramlarına yönləndirilməsi nəzərdə tutulur”.
Ekspertin fikrincə, sertifikatlaşdırma təhsil məzmununun yenidən baxılmasına və daha müasir və effektiv təlim metodlarının tətbiqinə təkan verə bilər. Müəllimlər müasir tədris metodlarını tətbiq etmək üçün daha yaxşı hazırlanmış olurlar. Bu da şagirdlərin akademik nəticələrinə müsbət təsir göstərə bilər:
“Dünyanın bir çox ölkələrində müəllimlərin sertifikatlaşdırılması prosesi artıq uzun müddətdir ki, tətbiq olunur. Məsələn, ABŞ, Kanada və Avropa ölkələrində sertifikatlaşdırma müəllimlərin təlim keyfiyyətini ölçən əsas meyar kimi qəbul olunur. Bu təcrübə göstərir ki, sertifikatlaşdırma təhsilin keyfiyyətinin yüksəldilməsinə və müəllimlərin peşəkarlıq səviyyəsinin artırılmasına böyük təsir göstərir.
Beləliklə, sertifikatlaşdırma prosesi müəllimlərin peşəkar inkişafı üçün vacibdir və tədris keyfiyyətini artırmaq məqsədilə həyata keçirilən ən mühüm addımlardan biridir. Bununla yanaşı, prosesin obyektivliyinin təmin olunması və müəllimlərin psixoloji hazırlığının artırılması kimi problemlərin həll edilməsi lazımdır ki, təhsil sistemi daha yüksək keyfiyyətli nəticələrə nail ola bilsin”.
