Ümumi təhsil və məktəbəqədər təhsil müəssisələrində təhsil alanların rahat və təhlükəsiz daşınması məqsədilə “məktəb avtobusları”ndan istifadə təşkil ediləcək.
APA xəbər verir ki, bu, Prezident İlham Əliyevin sərəncamı ilə təsdiqlənən “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nda əksini tapıb.
Dövlət Proqramına əsasən, Rəqəmsal İnkişaf və Nəqliyyat Nazirliyi və Elm və Təhsil Nazirliyi, Daxili İşlər Nazirliyi, Maliyyə Nazirliyi, İqtisadiyyat Nazirliyi, Azərbaycan Nəqliyyat və Kommunikasiya Holdinqi, Nəqliyyatı Əlaqələndirmə Şurası ilə birlikdə 2025-2030-cu illərdə ümumi təhsil və məktəbəqədər təhsil müəssisələrində təhsil alanların daşınması üçün "məktəb avtobusları"ndan istifadə olunmasını təmin etməlidir.
Təhsil eksperti Kamran Əsədov “Sherg.az"a bildirib ki, şagirdlərin məktəbə və məktəbdən evə təhlükəsiz daşınması şəhər infrastrukturunun və təhsil sisteminin ayrılmaz hissəsidir:
“Bu prosesin müasir standartlara uyğun nəqliyyat vasitələri və peşəkar sürücülərlə həyata keçirilməsi həm şagirdlərin təhlükəsizliyini təmin edir, həm də şəhərdaxili tıxacların azalmasına kömək edir. Lakin, bəzi hallarda bu proses təcrübəsiz və əsəbi valideynlər tərəfindən fərdi nəqliyyat vasitələri ilə həyata keçirilir ki, bu da yol təhlükəsizliyi baxımından müəyyən risklər yaradır. Bakıda şəhərsalma zamanı məktəblər yaşayış binalarına yaxın inşa edilsə də, 4430 orta məktəbdə 1.6 milyon şagirdin təhsil alması nəzərə alındıqda, məktəbli nəqliyyatının zəruriliyi aydın olur. Şagirdlərin fərdi avtomobillərlə məktəbə gətirilməsi məktəb ətrafında sıxlıq və xaosa səbəb olur. Dövlət məktəblərində avtobus xidməti üçün büdcə ayrılmadığına görə, yalnız özəl məktəblərdə bu xidmət mümkündür. Belə olan halda, valideynlər birgə təşəbbüslə kiçik büdcə yaradaraq məktəb avtobusu təşkil edə bilərlər. Bəzi valideynlər uşaqlarını yaşadığı ərazidəki məktəbə deyil, şəhərin mərkəzindəki məktəblərə aparır. Belə hallarda fərdi nəqliyyat vasitəsi olmayan valideynlər ictimai nəqliyyatdan istifadə edir ki, bu da uşaqların məktəb yolunda saatlarla ayaq üstə qalaraq enerjilərini itirməsinə səbəb olur. Məktəb avtobusları isə uşaqların rahat və təhlükəsiz şəkildə məktəbə çatdırılmasını təmin edir. Xarici ölkələrdə məktəblilər üçün avtobus xidməti geniş yayılmışdır. Türkiyədə məktəb avtobusları sistemi uğurla tətbiq edilir. İnkişaf etmiş ölkələrdə bu sistem illərdir tətbiq olunur və effektivliyini sübut edib. Beynəlxalq təcrübə göstərir ki, şagirdlərin təhlükəsiz və rahat daşınması üçün məktəb avtobuslarının tətbiqi təkcə nəqliyyat problemlərinin həlli deyil, həm də təhsil keyfiyyətinə müsbət təsir göstərən vacib amillərdən biridir. Bu sahədə statistik araşdırmalar da təsdiq edir ki, məktəb avtobuslarından istifadə edən şagirdlər dərsə daha vaxtında və enerjili çatırlar, bu isə onların akademik göstəricilərinə müsbət təsir edir”.
