Azərbaycan Respublikası Prezidenti yanında Əfv Komissiyasının iclasları planlı şəkildə davam etdirilir. Növbəti iclas bir neçə gün öncə keçirildi və Əfv komissiyası üzvlərinin açıqlamalarına görə, toplantıda 100-ə yaxın müraciətə baxılıb. Növbəti Əfv fərmanının nə zaman imzalanacağına dair konkret tarix bildirilməsə də, bunun 28 May – Respublika Günü münasibətilə olacağına dair ehtimallar var. Nəzərə alsaq ki, cənab Prezident İlham Əliyevin sərəncamı ilə 2025- ci il “Konstitusiya və Suverenlik İli” elan edilib, Əfv fərmanının may ayında imzalanacağına inam böyükdür. Sual yaradansa Əfv fərmanının kimlərə şamil olunacağıdır. Qeyd edək ki, bu günlərdə hüquq müdafiə təşkilatları rəhbərləri, ziyalılar, media təmsilçilərinin bir qrupu adından cənab Prezidentə müraciət edilib. Müraciətdə hazırda həbsdə olan və sağlıq durumu ağır qiymətləndirilən “Xural” TV-nin rəhbəri, jurnalist Əvəz Zeynallının xəstəliyi və ciddi müayinə və müalicəyə ehtiyacı olduğu nəzərə alınaraq azadlığa buraxılması xahiş olunur.
“Sherg.az"a danışan D.Əliyeva adına Qadın Hüquqlarını Müdafiə Cəmiyyətinin sədri Novella Cəfəroğlu qeyd etdi ki, xəstə, yaşlı məhbusların əfvi məsələsini daim gündəmdə saxlayırlar:
- Əvəz Zeynallı, Tofiq Yaqublunun da səhhətində ciddi problemlər var. Ağır xəstə məhbusların cəzaçəkmə müəssisəsi daxilində müalicəsi mümkün deyil. Onlar kliniki şəraitdə müayinə və müalicə olunmalıdır. Biz həmişə xəstə məhbusların azadlığa buraxılması məsələsini gündəmdə saxlayırıq, tərəfimizdən tərtib olunan siyahılarda da onların adını ilk sıralarda qeyd edirik. Həbsxanalarda yaşı ötmüş, epilepsiya xəstəsi, serebral iflic, ağır şəkər xəstəsi, xərçəng xəstəsi olan məhbuslar var. Yaxşı olardı ki, bu cür məhbuslar Əfv fərmanı ilə vaxtından əvvəl azadlığa buraxılsınlar. Bu məhbuslar tez azad edilsə yaxşıdır.
N.Cəfəroğlu qeyd etdi ki, indiyədək də istər Əfv, istərsə də Amnistiya Aktı ilə bağlı müraciətlərdə yaşlı, xəstə məhbusların adlarını daim tərtib etdikləri və təqdim olunan siyahılara daxil ediblər:
- Əfv siyahısına biz siyasi motivlə tutulanları, “OMON”çuları, dindarları ayrı yazırıq, xəstə və yaşlı məhbusların adlarını da ayrıca yazırıq. Hansısa məhbusun cəzasının 2-3 il çəkilməyən hissəsi qalıbsa, cəzasının yarıdan çox hissəsini çəkibsə, onların da adlarını qeyd edirik. Təklif edirik ki, bu şəxslər amnistiyaya salınsın. Təklif edirik ki, saxlanılan, həbsdə olan jurnalistlər, blogerlər, siyasi motivlə həbs olunanlar buraxılsın. Və bu, milli barışığa səbəb olsun. İnanıram ki, cənab Prezident öz müstəsna səlahiyyətlərindən istifadə edərək, yenə də humanist addım ataraq xəstə məhbusları əfv edəcək.
