Zeynəb Əyyubova: Bəzən susqunluq illərlə yığılıb psixoloji partlayışa çevrilə bilər
Ağstafa rayonunda ailə münaqişəsi qanla bitib.
Teleqraf-ın yerli bürosu xəbər verir ki, hadisə rayonun Dağ Kəsəmən kəndində qeydə alınıb.
1988-ci il təvəllüdlü Abdulla Gəncəliyev kəsici alətlə xəsarət alıb və xəstəxanaya yerləşdirilib.
lkin məlumata görə, hadisəni törətməkdə qardaşı 1990-cı il təvəllüdlü Vaqif Gəncəliyev şübhəli bilinir.
Belə ki, atası ilə mübahisə edən qardaşını ayırmağa çalışan V. Gəncəliyev kəsici alətlə A. Gəncəliyevə qol və çiyin nahiyyəsindən xəsarət yetirib.
Hazırda yaralının vəziyyəti kafidir.
Psixoloq Zeynəb Əyyubova Sherg.az-a bildirib ki, Ailədaxili qətl, xüsusilə də qardaşın qardaşı öldürməsi, cəmiyyətimiz üçün son dərəcə ağrılı və düşündürücü hadisədir:
“Bu cür cinayətlərin köklərində adətən dərin psixoloji və sosial faktorlar dayanır. Birinci növbədə qeyd etməliyəm ki, ailədaxili münasibətlərdə uzun müddət yığılan, amma ifadə olunmayan emosiyalar — kin, qısqanclıq, dəyərsizlik hissi, diqqət çatışmazlığı və ya uşaqlıq travmaları zamanla partlayışa səbəb ola bilər. Bu cür hallarda insanlar bir-birlərini rəqib, təhdid və ya düşmən kimi qavramağa başlayırlar.
Qardaşlar arasında düşmənçiliyin əsas psixoloji kökləri bunlar ola bilər:
Valideynlərin bir övlada daha çox diqqət göstərməsi (seçkilik);
Maddi məsələlər və miras üstündə uzun sürən münaqişələr;
Həll olunmamış uşaq vaxtı travmaları və incikliklər;
Ailədə zorakılıq və ya emosional laqeydlik mühiti.
Bu tip hadisələr daha çox emosional savadsızlığın, ailədaxili ünsiyyətin yoxluğunun, psixoloji dəstəyə əlçatmazlığın və ya ona etinasız yanaşmanın olduğu mühitlərdə baş verir. Çox zaman insanlar daxili gərginliklərini illərlə içinə yığıb saxlayır və nəticədə bir qığılcımla bu gərginlik partlayışa çevrilir. Ən vacib addım emosional maarifləndirmə və psixoloji dəstəyin normallaşdırılmasıdır. İnsanlar psixoloqa getməyə utanmamalıdırlar. Hər ailədə mübahisə ola bilər. Amma bu mübahisələrin həll yollarını tapmamaq və duyğuları idarə edə bilməmək faciəyə yaradar. Ailədaxili ünsiyyətin gücləndirilməsi, empati qurma bacarığının inkişaf etdirilməsi, uşaq yaşlardan etibarən duyğusal tərbiyənin verilməsi bu riskləri azaldar. Münaqişələr yarananda ya tərəflər öz aralarında açıq və sağlam şəkildə danışmalı, ya da mütəxəssis dəstəyinə müraciət etməlidirlər. Unutmamalıyıq ki, susmaq hər zaman sülh deyil. Bəzən susqunluq illərlə yığılıb psixoloji partlayışa çevrilə bilər”.
