Biləsuvar rayonun Xırmandalı kənd sakini 15 yaşlı N.T zəhərlənmə diaqnozu ilə rayon xəstəxanasına çatdırılıb.
APA xəbər verir ki, həkimlərin səyləri sayəsində yeniyetmənin həyatı təhlükəsi aradan qalxıb.
Yeniyetmənin atası bildirib ki, övladı Tiktok platformasında gördüyü üsuldan istifadə etməklə Yeni il gecəsinə özü üçün “səs çıxaran” qurğu düzəltmək istəyib:
“Bu zaman bizdən xəbərsiz istifadə etdiyi “Net”in (təmizləyici vasitə) onu zəhərlədiyini bildik və təcili onu xəstəxanaya çatdırdıq".
Fakt araşdırılır.
Sosioloq Lalə Mehralı “Sherg.az”a bildirib ki, sosial şəbəkələrdə hökm sürən abu-havaya görə insanlar özlərini təqlidçilik etmək məcburiyyəti hiss edirlər:
“Bu bəzən özlərindən asılı olmur. Yəni ya qeyri şüuru, ya da bilərəkdən sadəcə səs toplamaq, baxış qazanmaq, məşhurlaşmaq sevdasına görə edirlər. Ümumiyyətlə trendlər, bir birini təqlid edən səhnələrin icrasıdır. Bütün hallarda hamı başqası olmağa çalışır. Bu yolda məşhur, rüsvay və xəstəxanalıq olanlar da çoxdur. Yəni onları nəyin gözlədiyini heç özləri də bilmirlər. Biabır da ola bilərlər bu biabırçılığın fonunda məşhurlaşa da bilərlər. Bu baxış sayı onlara pul qazandıra bilər. Əslində hər şey daha çox pul qazana bilmək naminə edilir. Yəni baxılsın, reklam olunsunlar, məşhurlaşsınlar və bunun müqabilində pul qazana bilsinlər. Trendlər bir növ xəstəlik halını alıb”.
