Xocalı rayonuna növbəti köç olacaq.
Teleqraf-ın əldə etdiyi xəbərə görə, rayonun Xanyurdu və Təzəbinə kəndlərinə qayıdış başlayır.
Bunun üçün müvafiq hazırlıq işləri görülüb və yaxın günlərdə evlərin bölgüsü üçün sakinlər arasında püşkatma keçiriləcək.
İşğaldan azad edilmiş ərazilərə böyük qayıdışın təmin olunduğu digər yerlərdə olduğu kimi Xanyurdu və Təzəbinə kəndlərində də abadlıq-quruculuq işləri görülüb. Yaşayış məntəqələrində lazımi infrastruktur yaradılıb, evlər təmir olunub, yollar çəkilib, sosial müəssisə və obyektlər inşa edilib.
Xatırladaq ki, indiyə kimi Xocalı ərazisində Xocalı şəhəri və Ballıca kəndinə köç baş tutub. Ümumilikdə Ballıca kəndinə 180 ailə (840 nəfər), Xocalı şəhərinə isə 86 ailə (346 nəfər) köçürülüb.
