Karyerası boyunca bir çox uğurlu filmdə rol alan amerikalı aktyor George Clooney şəxsi həyatı ilə bağlı açıqlamaları ilə gündəmə gəlib.
Sherg.az xəbər verir ki, Hollivud ulduzu George Clooney, 2014-cü ildə Amal Alamuddin ilə ailə həyatı qurmuşdu.
63 yaşlı aktyor CBS Mornings proqramında verdiyi müsahibədə həyat yoldaşı Amal ilə "həqiqətən vaxt keçirdiklərini" bildirib.
İki əkiz övladı Alexander və Ella haqqında danışan Clooney deyib:
“Uşaqlarımız 7 yaşındadır, tezliklə 8 olacaqlar. Bu, möhtəşəm yaş dövrüdür. Onlar həqiqətən maraqlıdırlar və çox gülməlidirlər. Hər bir valideyn uşaqlarının möhtəşəm olduğunu düşünür, bizimkilər isə doğrudan da bizi çox güldürürlər.”
George Clooney daha əvvəlki bir müsahibəsində 47 yaşlı həyat yoldaşı Amal ilə bir dəfə də olsun mübahisə etmədiklərini söyləmişdi.
Clooney: “Bir dəfə bu mövzuda danışdığımızı xatırlayıram və o zaman da heç mübahisə etmədiyimizi demişdik. Hələ də etməmişik. Hətta bəzən mübahisə edəcək bir səbəb tapmağa çalışırıq!” deyə zarafat edib.
Məşhur aktyor həyat yoldaşı haqqında bunları deyib:
“Bu inanılmaz qadınla tanış olduğum üçün özümü çox şanslı hiss edirəm. Sanki böyük lotereyanı udmuşam kimi hiss edirəm. Dünyanın ən şanslı adamı olduğumu düşünmədiyim bir gün belə keçmir. Bu səbəblə, bu münasibət bizim üçün çox möhtəşəmdir.”
