Tarkan turnesini niyə yarımçıq qoymaq istəmədiyini konsertdə açıqladı
Məşhur sənətçi Tarkan, anası Neşə Tevetoğlunun ölümündən sonra ara verdiyi Almaniya turnesinə davam edir. O, konsertdə etdiyi çıxışda turneni niyə yarımçıq qoymaq istəmədiyini izah edib.
Sherg.az xəbər verir ki, məşhur müğənni Tarkan Tevetoğlunun 68 yaşında infarktdan dünyasını dəyişən anası Neşə Tevetoğlu, 17 aprel tarixində İstanbulda son mənzilə yola salınmışdı. Avropa turnesində olan Tarkan, xəbəri alan kimi dərhal İstanbula qayıtmışdı.
Tarkan, anasının vəfatından sonra etdiyi paylaşımda belə yazmışdı:
“Ana itkisi içində yanan odlu bir atəşdir. Bilirəm ki, bu atəş asanlıqla sönməyəcək. Ən çox ehtiyacım olan günlərdə ürəyimə su səpən və yanımda olan hər kəsə çox təşəkkür edirəm. Bu ağır günlərimdə mənə dəstək olan bütün sevdiklərimə, dinləyicilərimə, ailəmə, qohumlarıma, yaxın dostlarıma, komandama və bütün dəyərli sənətçi dostlarıma ürəkdən təşəkkür edirəm. Amma ən çox da bu çətin günlərdə daim yanımda olan həyat yoldaşım Pınara və varlığı ilə zaman-zaman acımı unutdurub üzümü güldürən canım qızıma təşəkkür edirəm. Sağ olun, var olun.”
Anasının vəfatından sonra ilk dəfə səhnəyə çıxan Tarkan, Ştutqartdakı konsertində göz yaşlarını saxlaya bilməmişdi.
Tarkan, Hamburq konsertində onu dinləməyə gələn tamaşaçılara turnesini niyə dayandırmadığını bu sözlərlə izah edib:
“Təşəkkür edirəm. Bu gün sizi də üzmək, sizə acımı yansıtmaq istəmirəm. Siz mənə yaxşı təsir edin, mən də sizə. Doğrudan da bir az rahatlayaq. Amma arada da məni bağışlayın. Hələ bir az vaxta ehtiyacım var. Sizin enerjinizə çox ehtiyacım var. Ona görə bu konsertləri mütləq edəcəyimi dedim. Mənim onlara ehtiyacım var. Yaxşı gündə də, pis gündə də birlikdə olmalıyıq.”
Konsertdən sonra sosial media hesabında paylaşım edən Tarkan yazıb:
“Çox təşəkkürlər, Hamburq. Sevginiz və dəstəyinizlə daha yaxşıyam. Hər konsert mənə dərman kimi gəlir. Yaxşı ki, varsınız.”
