“Friends” serialı ilə yadda qalan Hollivud ulduzu Jennifer Anistonun Los-Ancelesdəki 21 milyon dollar dəyərindəki evinə girməyə çalışan şəxs yaxalanıb.
Sherg.az xəbər verir ki, Jennifer Aniston böyük bir şok yaşayıb.
“Daily Mail”in xəbərinə görə, 70 yaşlarında olduğu təxmin edilən bir kişi aktyorun ərazisinə avtomobili ilə izinsiz daxil olub.
56 yaşlı Jennifer Aniston hadisə baş verən vaxt evdə olub.
TMZ saytının məlumatına görə, dəvət olunmamış qonaq Los-Anceles Polis İdarəsinin gəlməsini gözləyərkən Anistonun mühafizəçiləri tərəfindən yaxalanıb və silah gücü ilə nəzarət altına alınıb.
Anistonun mühafizəçilərinin hadisədən sonra dərhal avtomobilə doğru qaçdığı və sürücünü maşından çıxardığı bildirilib.
Los-Anceles Polis İdarəsinin sözçüsü Jeff Lee, “oğurluq şübhəsi” ilə əraziyə gəldiklərini və şəxsin “avtomobili ilə mülkün qapısından içəri girərək zərər verdiyini” açıqlayıb.
Polis, Jennifer Anistonun şübhəli ilə birbaşa təmasda olmadığını və hadisə zamanı heç kimin xəsarət almadığını bildirib.
Rəsmilər, şəxsin evə daxil olmasa da, vurduğu ziyana görə həbs olunacağını qeyd ediblər.
